ئیسرائیل لە قەیرانێکی قورسدایە و مێشکی سەربازانیشی شڵەقاوە

964+

ژووری هەواڵ

رێکخراوە جیهانییەکان دەڵێن ئاژەڵەکانی غەزە برسی کراون و روسیاش هەڕەشە لە هەواڵگری ئۆکرانیا دەکات، فەرموون ئەمە حاسڵاتی دەرودراوسێیە:

ئاژانسی رۆیتەرز لە زاری رێکخراوی خۆراک و کشتوکاڵی جیهانییەوە دەڵێت: ئیسرائیل ناهێڵێت تەنانەت عەلەفی ئاژەڵ و پەلەوەریش بچێتە ناو غەزە.

موشێ یعالون سەرۆک ئەرکانی پێشووی سوپای ئیسرائیل بەرۆژنامەی مەعاریفی ئیسرائیلی وتووە: دەوڵەتی ئیسرائیل لەوەتەی دروست بووە هیچ کاتێک هێندەی ئێستا لە قەیراندا نەبووە.

رۆژنامەی یەدیعۆت ئەحرونۆتی ئیسرائیلی نوسیویەتی: 60% ئەو سەربازە ئیسرائیلیانەی لەشەڕی غەزە بریندار بوون، تووشی هەژان و شڵەێقانی مێشک بوون.

ئیسماعیل هەنیە سەرۆکی مەکتەبی سیاسی حەماس دەڵێت: سەرەڕای ئەو باجە گەورەیەی کە خەڵک داوێتی، بەڵام ئیسرائیل نەیتوانیوە ئامانجە سیاسی و سەربازییەکانی بهێنێتە دی.

فوئاد حسێن وەزیری دەرەوەی عێراق دەڵێت: لە گفتوگۆکانماندا لەگەڵ ئەمریکا داوامان کردووە ئەمریکا رۆڵی خۆی بگێڕێت بۆ راگرتنی شەڕ لە غەزە.

بەڕێوەبەری ئاسایشی فیدراڵی روسیا دەڵێت: وڵاتانی خۆرئاواو ئۆکرانیا دەستیان هەبووە لە هێرشەکەی روسیا، بۆیە لەمڕۆوە کار بۆ ئەوە دەکەین سەرۆکی هەواڵگری ئۆکرانیا بە ئامانج بگرین.