دیمەنێك لە شاری كەركوك، وێنە: سۆشیاڵمیدا
سەدام حسێن شەش ساڵ زیندانی دەکرێت
+964
كاروان ساڵحی – كەركوك
سەدام حسێن، بەڕێوەبەری پێشووی پلاندانان و چاودێری لە دیوانی پارێزگای كەركوك بەتۆمەتی گەندەڵی شەش ساڵ زیندانی دەكرێت، بەپێی بڕیاری دادگای شارەکە.
سەرچاوەیەکی تایبەت لەناو دادگای کەركوك بە +964ی وت، سەدام حسێن بەڕێوەبەری پێشوی پلاندانان و چاودێری بووە لە دیوانی پارێزگای كەركوك، تۆمەتبار بووە بە گەندەڵی لە پڕۆژەی بینای ڤێتێرنەری ناحیەی ریاز.
بەڵام دادگاییەکە و بڕیاری شەش ساڵ زیندانی بە غیابی بەسەر سەدام حسێن سەپێندراوە، چونکە خۆی هەڵهاتووە و لە کەرکوک نەماوە.
دەستەی دەستپاكی كەركوك لە راگەیەندراوێکدا كە وێنەیەكی دەست +964 کەوتووە دەڵێت، بەپێی مادەی 340 لە یاسای سزادانی عێراقی سزایان بەسەریدا سەپاندووە.
بەپێی بڕیارەكە، دەبێت دەست بەسەر سەرجەم ماڵ و موڵكیدا بگیرێت و رێگریی لێبكرێت لە گەشتكردن بۆ دەرەوەی وڵات.
سەرچاوەیەک بە 964+ی وت، سەدام حسێن بۆ تورکیا هەڵهاتووە و ئەو بڕە پارەیەشی کە وەکو سەرانە وەریگرتووە بریتی بووە لە 17 ملیار دینار.