تیمە پزیشکییەکەی ئێران 300 بەرکەوتووی چەکی کیمیاییان بینی

پێشەوا محەمەد

تیمە پزیشکییەکەی ئێران کە سەردانی شاری هەڵەبجەیان کردبوو، لە ماوەی دوو رۆژدا 300 بەرکەوتووی چەکی کیمیاییان بینیوە و پشکنینیان بۆ کردوون.

تیمەکە رۆژی 29.2.2024 گەیشتبوون و رۆژانی یەک و دووی ئەم مانگە دەستیان بە چارەسەرییەکانیان کردبوو.

بەوتەی د.ئازاد مستەفا، بەڕێوەبەری تەندروستیی هەڵەبجە کە قسەی بۆ 964 کردووە، تیمەکە لە پزیشکانی سنگ و چاو پێکهاتبوون و بۆ ماوەی دوو رۆژ بریندارەکانی بەرکەوتووی چەکی کیمیاییان بینیوە.

وتیشی، “ئەو نەخۆشانە پێویست بوو بچنە ئێران بۆ بینینی پزیشک، بەڵام کارێک کرا پزیشکەکان هاتن و لە نەخۆشخانەی بەرکەوتووانی چەکی کیمیایی لە هەڵەبجە دانیشتبوون”.

نزیکەی دوو هەزار و 500 کەس وەک بەرکەوتووی چەکی کیمیایی تۆمار کراون.

“ئەو تیمەی هاتبوون دەرمان و پێویستیی تەواویان پێبوو و چارەسەری پێویستیش بۆ ئەو نەخۆشانە کرا، کە کیمیایی کێشەیان بۆ چاو و سنگی ئەو نەخۆشانە دروست کردبوو”، ئازاد مستەفا وای وت.

ئەوە یەکەمجار نییە تیمی پزیشکی لە ئێرانەوە بێتە هەرێم بۆ بینین و چارەسەرکردنی بەرکەوتووانی چەکی کیمیایی، بەڵکو پیشتریش زیاد لە دوو تیمی پزیشکی هاتوونەتە سلێمانی و هەڵەبجە و ئەو بەرکەوتووانەیان بینیوە.