لە رۆژی ژینگەی هەولێر بەردەم گۆڕستانێک دارڕێژ کرا

توانا نەقی

لە چالاکییەکدا بۆ رۆژی ژینگەی هەولێر، بەردەم گۆڕستانی کۆنی هەولێر دارڕێژ کرا و سەدان گوڵیش بەخشرایە شۆفێران، چالاکییەکان بۆ ماوەی هەفتەیەک بەردەوام دەبێت.

ئەمڕۆ 25.2.2024 لە چالاکیەکدا بۆ رۆژی ژینگەی هەولێر ئەندازەی پارکەکانی هەولێر بڵاویکردەوە، بە هاوکاری رێکخراوێکی ژینگەیی 200 گوڵی جۆراوجۆر و چەندین دار لە بەردەم گۆڕستانی کۆنی هەولێر چێندرا.

رێبین ئەحمەد بەڕێوەبەری ئەندازەی پارکەکانی هەولێر بە 964ـی وت، هەموو 22.2. ساڵێک بە رۆژی ژینگەیی هەولێر دەستنیشانکراوە و لە ماوەی هەفتەیەکدا چەند چالاکییەکی جۆراوجۆر ئەنجام دەدرێت.

وتیشی، یەکێک لە چالاکاییەکانی ئەو هەفتەیە چاندنی 22 داری لانکستڕۆم بووە لە بەردەم گۆڕستانی کۆنی هەولێر و دابەشکردنی 200 گوڵ بووە بەسەر شۆفێراندا.

هەروەها هەر لە ماوەی ئەم هەفتەیەدا دارستانی کەسنەزان پاک دەکەنەوە و لە چالاکییەکی دیکەدا چەندین باڵندەی کێوی بەرەڵا دەکەنە ناو سروشتەوە.

به‌ گوێره‌ی نوێترین داتا، رێژه‌ی سه‌وزایی له‌ هه‌ولێر له‌ 20% نزیكبووه‌ته‌وه‌.