ساڵی رابردوو 445 کەس رۆحیان دەرچووە بە رووداوی هاتوچۆ

964+

هاوبەش ئەبوبەکر – سلێمانی

ساڵی رابردوو نزیكەی چوار هەزار رووداوی هاتوچۆ لە هەرێمی کوردستان روویانداوە و بەهۆیانەوە 445 كەس گیانیان لەدەستداوە.

عەمید محەمەد روشدی، بەڕێوەبەری بەشی پەیوەندی و راگەیاندنی هاتوچۆی هەرێم لە كۆنفرانسێكی رۆژنامەوانیدا رایگەیاند، ساڵی رابردوو سێ هەزار و 706 رووداوی هاتوچۆ بە جۆرەكانی پێكدادان، وەرگەڕان و شێلان لە هەرێم تۆماركراون.

 بەهۆی رووداوەکانی هاتوچۆوە، 445 كەس گیانیان لەدەستداوە و حەوت هەزار و 225 كەس برینداربوون.

بەپێی ئامارەکانی هاتوچۆی هەرێم، لەكۆی ئەو رووداوانەی کە لە ساڵی 2022 تۆمارکراون، 444یان بەهۆی ماتۆرسكیلەوە بوون.

جۆری رووداوەکان:

2909 پێکدادان

438 شێلان

773 وەرگەڕان

ژمارەی رووداوەكانی هاتوچۆ لە ساڵی 2022دا، بەراورد بە ساڵی پێشووتر 414 رووداو كەمیكردووە و ژمارەی گیانلەدەستدانیش 178 کەس کەمتر تۆمارکراوە.

جگە لە سەرپێچی كامێراكانی چاودێری، 499 هەزار و 394 سەرپێچی هەمەجۆر تۆماركراون و ژمارەکە زیادیکردووە. کامێراکانی چاودێری و تیژرەوی ئۆتۆمبێل یەک ملیۆن و 825 هەزار و 976 سەرپێچیان تۆمار کردووە.

هاتوچۆی هەرێم دەڵێت، ساڵی رابردوو دەست بەسەر 15 هەزار و 919 ئۆتۆمبێل و ماتۆرسکیلدا گیراوە و 15 هەزار و 11 شۆفێر بەهۆی سەرپێچیکردنەوە دراونەتە دادگا.