چاککردنەوە و پاککردنەوەی گۆزەیەکی مۆزەخانەی کۆیە. فۆتۆ: پەیمانگەی عێراقی بۆ پاراستنی شوێنەوار و کەلەپوور.
پارچەی تێدایە شەش هەزار ساڵ کۆنە
مۆزەخانەکەی کۆیە ئامادەی کردنەوەیە
964+
پێشەوا محەمەد
مۆزەخانەی کۆیە ئامادەی کردنەوەیە و سەرجەم پارچەکانی ئامادەن، بەڕێوەبەری شوێنەواری کۆیە دەڵێت، چاوەڕێی کونسوڵخانەی ئەڵمانیان بۆ کردنەوەکەی.
خەرجیی مۆزەخانەکە لە لایەن کونسوڵخانەی ئەڵمانیاوە دابینکراوە، 100 پارچەی شوێنەواریی تێدا دادەندرێت و پارچەکان سەردەمەکانیان دیاری کراوە.
یەکێتی واحید، بەڕێوەبەری شوێنەواری کۆیە بە 964ـی راگەیاند، مۆزەخانەکە هەر لەناو بینای خۆیان لەناو قشڵەی کۆیەدا دەبێت و سەرجەم جامخانە و پێویستییەکانی ناوی ئامادەکراون و تەواو بوون.
وتیشی، “ئەوە هەنگاوی یەکەمە، لەگەڵ کردنەوەی دەتوانین بڵێین مۆزەخانەمان هەیە و گەشتیاران بێن بۆ بینینی ئەو کەلوپەلانەی تێیدا دادەندرێن”.
230 ناوچەی شوێنەواری لە کۆیە دیاریکراون، بەڵام بەڕێوەبەرەکەی دەڵێت زیاترن و هیوادارن لە داهاتوودا ناوچەی دیکە بدۆزرێتەوە.
کەلوپەلە مێژووییەکان پێکهاتوون لە کوپە، پەیکەر، سکە، پارە، گۆزە، چەقۆ و کەرەستەی جوانکاری، کە لە ساڵانی پێشوودا دۆزراونەتەوە.
“پارچەی تێدایە مێژووەکەی بۆ شەش هەزار ساڵ دەگەڕێتەوە و هی سەردەمی چاخی بەردین و پێش ئیسلامی تێدایە”، یەکێتیی واحید وای وت.
