وەزارەتی دەرەوەی ئەمریکا داوای لێکۆڵینەوە لە هێرشەکەی کۆرمۆر دەکات

ژووری هەواڵ

وەزارەتى دەرەوەى ئەمریکا داوا لە حکومەتی عێراق دەکات لێکۆڵینەوە لە هێرشکردنە سەر کێڵگەی غازی کۆرۆمۆر بکات و بکەرانی دەستگیر بکات.

ئەمڕۆ هەینی 26.1.2024، وەزارەتى دەرەوەى ئەمریکا راگەیەندراوێکى بڵاوکردەوە و تیایدا سەرکۆنەى هێرشکردنە سەر کێڵگەى گازیى کۆرمۆر دەکات و داواش لە حکومەتى عێراق دەکات لێکۆڵینەوە لە هێرشەکە بکات.

لە راگەیەندراوەکەیدا، وەزارەتی دەرەوەی ئەمریکا گروپە چەکدارەکانی نزیک لە ئێران تۆمەتباردەکات بە ئەنجامدانی هێرشەکە و دەڵێت، زیانی بە ژێرخانی مەدەنی و سەرچاوەکانی بەرهەمهێنانی وزە گەیاندووە لە تەواوی هەرێمی کوردستان.

“لەپاڵ هاوبەشەکانمان لە عێراق، بە هەرێمی کوردستانیشەوە، دەوەستین لەدژی ئەم کارە تێکدەرانە و بێمانایانە، داواش لە دەسەڵاتدارانی عێراق دەکەین لێکۆڵینەوە بکەن و ئەو کەسانە بدرێنە دادگا کە بەرپرسیارن”، وەزارەتی دەرەوەی ئەمریکا وا دەڵێت.

دەشڵێت، ئەمریکا بەردەوام دەبێت لە کارکردن لەگەڵ حکومەتی عێراق و حکومەتی هەرێمی کوردستان بۆ پشتیوانی لە سەروەری و ئاسایشی عێراق.