چەند کارمەندێکی یەکێک نەمامەکانی باخچەکانی سلێمانی لە کاتی کاردا - وێنە: باخچەکانی سلێمانی
"پشت بە خۆمان دەبەستین"
باخچەکانی سلێمانی پلانی بەرهەمهێنانی 500 هەزار نەمام و گوڵی هەیە
964+
پێشەوا محەمەد
بەڕێوەبەرایەتی باخچەکانی سەر بە شارەوانی سلێمانی لە پلانیدایە لە رێگەی چوار نەمامگەوە تا بەهار 500 هەزار نەمام و گوڵەباخ و پەرژین بەرهەم بهێنێت.
بەڕێوەبەرایەتییەکە خاوەنی نەمامگەیەکی سەرەکی و سیانی دیکەی لاوەکییە و بە پێی زانیارییەکانی ئەوان کە دراوە بە 964، لە دوو مانگی رابردوودا 150 هەزار نەمام و گوڵەباخیان بەرهەمهێناوە.
عەلی حامید، وتەبێژی باخچەکانی سلێمانی بە 964ـی وت، “گرنگی بە بەرهەمهێنانی جۆرەکانی بەیبی رۆر بە هەموو رەنگەکانییەوە، گوڵەباخ، پەرژین لە جۆری رۆزماری، شمشاد، ڤینکا، سنۆبەری خشۆک، لاڤاندەر و هایدا دەدەین، کە لەگەڵ کەشوهەوای سلێمانیدا دەگونجێن”.
وتیشی، “سەرجەم ئەو نەمام و گوڵەباخانەی بەرهەمدەهێندرێت دەخرێنە ئینجانەوە و ئامادە دەکرێن بۆ وەرزی بەهار بۆ روواندنیان بەتایبەت لە بلوارەکانی شاری سلێمانیدا”.
لەناوشاری سلێمانی لەسەر و 80 بلوار بوونیان هەیە.
“بەردەوام بەرهەمی نەمامگەکانمان زیاد دەکەن و ئەوەش وامان لێدەکات لە بەڕێوەبەرایەتی باخچەکان زیاتر پشت بە بەرهەمی خۆمان ببەستین”، عەلی حامید وای وت.
