رووداوێکی هاتوچۆ روویدا و ئۆتۆمبێلێکی بەرگری شارستانی هۆکار بووە

هۆگر عەدنان – چەمچەماڵ

رووداوێکی هاتوچۆ لەنێوان چوار ئۆتۆمبێل روویداوە و حەوت کەس بریندارن، رێپێدراوێکی هاتوچۆ دەڵێت، ئۆتۆمبێلێکی بەرگری شارستانی هۆکاربووە.

رووداوەکە لەنێوان رێگای چەمچەماڵ – ناحیەی تەکیەی کاکەمەند روویداوە.

شۆڕش ساڵح رێپێدراوی هاتوچۆ بە 964ی وت، “رووداوەکە کاتژمێر 2:50 خولەک روویداوە، لەکاتی سوڕانەوەی ئۆتۆمبێلێکی بەرگری شارستانی بەئاراستەی ناحیەی تەکیە، ئۆتۆمبێڵێک لەجۆری کیای بەرز خۆی کێشاوە بە ئۆتۆمبێلەکەی بەرگری شارستانی و دواتر دوو ئۆتۆمبێلی دیکەش خۆی پێیاندا کێشاوە”.

ئەو رێپێدراوەی پۆلیسی هاتوچۆ دەڵێت، “هۆکاری سەرەکی ئۆتۆمبێلەکەی بەرگری شارستانی بووە و لەئەنجامدا حەوت کەس برینداربون”

سەرچاوەیەک لەتەندروستی چەمچەماڵ بە964ی وت، “تەندروستی بریندارەکان باشە و لەنەخۆشخانەی شەهید پێشرەو لەچەمچەماڵ لەژێر چاودێریدان و کاری پێوستیان بۆ دەکرێت”.