تورکیا 930 هێرشی کردووەتە سەر رۆژئاوای کوردستان

پێشەوا محەمەد

لە ساڵی 2023ـدا تورکیا 930 جار رۆژئاوای کوردستانی بۆردوومان کردووە، بەپێی ئامارێکی ئاژانسی نۆرس پرێس کە ئاژانسێکە تایبەتە بە هەواڵەکانی سوریا و رۆژئاوای کوردستان، 78%ـی ئەو ناوچانەی بۆردوومان کراون شوێنی نیشتەجێبوون بوون.

بەشی چاودێری و بەڵگەکردنی ئاژانسەکە بڵاوی کردووەتەوە، لەو هێرشانەدا 711 ناوچەی نیشتەجێبوون، 53 ژێرخانی ئابووری، 52 شوێنی هێزەکانی سوریای دیموکرات و 65 شوێنی هێزەکانی حکومەت کراونەتە ئامانج.

هەر بەپێی زانیارییەکان، بۆردوومانەکانی تورکیا 21 شوێنی زەوییە کشتوکاڵییەکان و 24 دامەزراوەی پیشەسازی و چوار ناوەندی تەندروستیی گرتووەتەوە.

ئاماژە بەوەش دراوە، ژێرخانی ئابووری و لە وانەش دامەزراوەی خزمەتگوزاری، تەندروستی، نەوت و وزە، ئامانجی هێرشەکانی تورکیا بوونە بۆ سەر رۆژئاوای کوردستان، کە بووەتە هۆی بێبەشکردنی ملیۆنان کەس لەو خزمەتگوزارییانە.

“ژمارەی قوربانییەکان بەهۆی بۆردوومانەکانی تورکیا گەیشتووەتە 368 کوژراو و بریندار کە 176 کەسیان مەدەنی بوون، هاوکات لەگەڵ هێرشەکانی تورکیا نۆ ژن و پێنج منداڵ کوژراون، هەروەها 23 ژن و 18 منداڵ بریندار بوون”، ئەمەش بەپێی راپۆرتەکەی ئاژانسی نۆرس پرێس.