ژمارەیەک هاوڵاتی کە دەیانەوێت بچن بۆ عومرە - وێنە: بەڕێوەبەرایەتی حەج و عەمرە
بە جەڵتەی دڵ
عەمرەکارێکی کورد لە مەککە کۆچی دوایی کرد
964+
کامیار کەمال – پێنجوێن
بەرەبەیانی ئەمڕۆ عەمرەکارێکی کورد کە خەڵکی پێنجوێنە لە مەککە بەجەڵتەی دڵ کۆچی دوایی کردووە و هەر لەوێش بە خاک دەسپێردرێت.
بەگوێرەی وتەی ئەو کەسانەی لەگەڵیدا بوون پاش نوێژی بەیانی کۆچی دوای کردووە و هیچ نەخۆشیەکی نەبووە.
لەوبارەیەوە ئارام فواد یەکێک لەو عەمرەکارانەی لەگەڵیدابوو بە 964ی راگەیاند، لە 16ی ئەم مانگەوە هاتوونەتە مەککە و بڕیار بووە رۆژی سێشەممە بگەڕێنەوە.
وتیشی، ئەم بەیانییە لە حەرەمی مەککە نوێژی بەیانی ئەنجامداوە و دواتر کە گەڕاوەتەوە بۆ هۆتێل ئیحرامی بەستووە و ویستویەتی بگەڕێتەوە بۆ کەعبە بەڵام گیانی لەدەستداوە.
باسی لەوەشکرد، لە نەخۆشخانەکانی سعوودیە پێیان راگەیاندنوون کە بە جەڵتەی دڵ کۆچی دوایکردووە و هەر لەوێش بەخاک دەستپێردێت و دوای تەواوکردنی رێکارەکان تەرمەکەیان رادەستدەکرێتەوە و لەوێ نوێژی لەسەر دەکرێت.
فەرمان ئەحمەد خاوەنی ئەو کۆمپانیایەی کە عەمرەکارەکە لەگەڵیدا رۆشتووە بە 964ی راگەیاند، ناوی ئەو عەمرەکارە خالید عەبدوڵایە و ئەو زانیاریەی لای ئەوانە بەهۆکاری جەڵتەی دڵ کۆچی دوایی کردووە.
