لیترێک غازی ئۆتۆمبێل لە سلێمانی بوو بە 625 دینار

964+

پێشەوا محەمەد

ئەمڕۆ لیترێک غازی ئۆتۆمبێل لە بەنزینخانەکانی سلێمانی بە 625 دینار بووە و لە ماوەی کەمتر لە دوو هەفتەشدا بڕی 75 دینار چووەتە سەر هەر لیترێک.

بەپێی بەدواداچوونەکانی 964، نرخی تۆنێک غاز ئێستا بە ملیۆنێک و 200 هەزار دینار دەفرۆشرێت و لە چاو دوو هەفتە پێش ئێستاوە هەر لیترێک نزیکەی 100 هەزار دیناری چووەتەسەر.

رێبەر قادر، بەڕێوەبەری یەکێک لە بەنزینخانەکانی سلێمانی بە 964ـی وت، هۆکاری گرانبوونەکەی پەیوەندی بەوەوە هەیە ئێستا لە کێڵگەی کۆرمۆرەوە کەمتر دێننە بازاڕ و ئەوەش نرخەکەی بەرز کردووەتەوە.

بە پێی بەدواداچوونێکی 964، لە مانگی هەشتەوە تا ئێستا هەر لیترێک غازی ئۆتۆمبێل 225 دینار گران بووە.

پێشتر سەرچاوەیەکی بەڕێوەبەرایەتیی نەوت و کانزاکانی سلێمانی بە 964ـی راگەیاند، غازێکی زۆر بەرەو پارێزگاکانی دیکەی عێراق دەڕوات و ئەوەش وای کردووە لە ناوخۆدا غازەکە گرانتر بدرێت بە بەنزینخانەکان.

964 زیاد لە سێ جار لەگەڵ بەهمەن قادر، وتەبێژی بەنزینجانەکانی سلێمانی قسەی کرد، بەڵام ئامادە نەبوو هیچ قسەیەک لەوبارەیەوە بکات.

نرخی نەوتی ماڵان روو لە دابەزینە