پێنجوێن پێویستى بە بیناى قوتابخانەیە

964+

کامیار کەمال – پێنجوێن

لە قەزاى پێنجوێن تەنیا 12 بیناى قوتابخانە هەیە، بەڵام بەقسەى پەروەردەى پێنجوێن پێویستیان بە سێ تا پێنج بیناى دیکە هەیە، لە ئێستاشدا بایکۆت بەردەوامە و دەرگاى قوتابخانەکان بە داخراوى ماونەتەوە.

لە تەواوى سنورى قەزاى پێنجوێن، 83 بیناى قوتابخانە و باخچەى ساوایان و نەهێشتنى نەخوێندەوارى هەیە، بە وتەى ئەسعەد جافر، بەڕێوەبەرى پەروەردەى قەزاکە بۆ 964،” لەو ژمارەیە 12یان بیناى قوتاخانەن کە بە هەموویانەوە 17 دەوامى تێدا دەکرێت و زۆربەیان دوو قوتابخانەن لە ناو یەک بینادا.

بۆ چارەسەرکردنى کێشەکە، ئەسعەد جافر دەڵێت: پێویستمان بە پێنج قوتابخانەى 18 پۆلى هەیە، بەڵام ئەگەر سێ قوتابخانەمان بۆ بکرێتەوە، کارمان باشتر دەبێت.

لە قەزای پێنجوێن، 11 هەزار قوتابى و نزیکەی هەزار مامۆستا بوونیان هەیە کە 583 یان وانەبێژن.

ئەوەش هاوکاتە لەگەڵ بەردەوامى بایکۆتى پڕۆسەى خوێندن و ئەمڕۆش لە قەزاکە خۆپیشاندانى مامۆستایان و وانەبێژان بەردەوامى هەیە.

پێداچونەوە: وریا فەتاح