چیتر ئۆتۆمبێلە بارهەڵگرەکانی پەروێزخان کێشی زیادە بار ناکەن
شۆفێرەکان ناڕەزایەتییان دەربڕی
میدیازان – هونەر فارس – کەلار
دوای ئەوەی کێشی باری ئۆتۆمبێلە بارهەڵگرەکانی مەرزی پەروێزخان لە لایەن خاوەن کاڵاکانەوە زیادکرا، شۆفێران ناڕەزایەتییان دەربڕی و بەڕێوەبەرایەتیی هاتوچۆی گەرمیانیش بڕیاریدا چیتر کێشی زیادە قەدەغە بکرێت.
فەرهاد کەریم، یەکێک لە شۆفێرە بارهەڵگرەکانی مەرزەکە بە میدیازانی ڕاگەیاند: کێشی ئاسایی ئۆتۆمبێلی فلات ٢٨ تۆنە، بەڵام لە لایەن بازرگانانەوە بۆ ٤٠ تۆن زیاد کراوە و ئێمەش هەمان کرێی پێشتر وەردەگرین.
شۆفێرانی مەرزەکە پێشنیوەڕۆی ئەمڕۆ چوارشەممە لە بەردەم بەڕێوەبەرایەتیی هاتووچۆی گەرمییان گردبوونەوە و داوای چارەسەرکردنی کێشی زیادی بارەکانیان دەکرد.
عەمید موحسین مەنسور، بەڕێوەبەری هاتووچۆی گەرمییان، سەبارەت بەو کێشەیە بە میدیازانی راگەیاند: ئێمە پشتگیریی داواکانی ئەو شۆفێرانەین و پێمان ڕاگەیاندوون لەمەودوا لە کێشی باری ئاسایی خۆیان باری نەکەن و ئێمەش ڕێگە نادەین.