یەکێک لە جۆرەکانی تەماتەی بەرهەمهێنراوی قەزای سۆران. وێنە:964
باینجان و کولەکەشی لەگەڵە
باج لەسەر هاوردەکردنی تەماتە، خەیار و پیاز هەڵگیرا
964+
پێشەوا محەمەد
وەزارەتی کشتوکاڵی هەرێم باجی لەسەر هاوردەکردنی تەماتە، خەیار، پیاز، باینجان و کولەکە هەڵگرت و مەبەستیش لێی وەک خۆیان دەڵێن، گران نەبوونیانە چونکە بەرهەمی ناوخۆ تەواو بووە.
ساڵانە لەگەڵ پێگەیشتنی بەرهەمی ناوخۆ وەزارەتی کشتوکاڵ باج دەخاتە سەر ئەو بەرهەمانە بە مەبەستی هاندانی جوتیاران و ساغکردنەوەی بەروبوومیان.
“لە پاییزەوە ئەو بەرهەمانە لە ناوخۆدا نامێنن و وەزارەتی کشتوکاڵ باجیان لەسەر لادەبات، بە مەبەستی گران نەبوونیان لە بازاڕدا”، ئەوە قسەی شاڵاو جەمال، بەڕێوەبەری کشتوکاڵی سلێمانییە بۆ 964.
دەشڵێت، بەردەوام کار بۆ زیاترکردنی ئەو بەرهەمانە دەکرێت و هەوڵی ئەوە دەدرێت لە هەموو وەرزێکدا بەرهەمی ناوخۆ بوونی هەبێت.
نرخی تەماتەی ناوخۆ لە نێوان 550 بۆ 650 دیناردایە و هی هاوردەش لە نێوان هەزار و 400 بۆ هەزار و 700 دینارە، خەیاری ناوخۆ کیلۆی لە نێوان 700 بۆ 800 دینارە و هی هاوردەش لە نێوان 800 بۆ 900 دیناردایە.
نرخی کیلۆیەک باینجانی ناوخۆ لە نێوان 350 بۆ 400 دینارە و هی هاوردە لە نێوان 650 بۆ 800 دینارە، نرخی کیلۆیەک کولەکەی ناوخۆ لە نێوان هەزار بۆ هەزار و 100 دینارە و هی هاوردەش لە نێوان 700 بۆ 800 دیناردایە، هەروەها نرخی کیلۆیەک پیازی ناوخۆ لە نێوان 650 بۆ 700 دینارە و هی هاوردەش لە نێوان 600 بۆ 650 دیناردایە.
