دیمهنێكی لیژنه‌كه‌ى كشتوكاڵى به‌غدا له گوندى گردهچاڵى قه‌زاى پیرمام... وێنه: هۆبهى كشتوكاڵى پیرمام
تا ئێستا بانكى رووه‌كى له‌هه‌رێمدا نیه
لیژنه‌یه‌كی كشتوكاڵى به‌غدا پشكنین بۆ گژوگیاى پیرمام ده‌كات
964+
فه‌رهاد حه‌سه‌ن
ليژنه‌یه‌كی تایبه‌ت له وه‌زاره‌تى كشتوكاڵى عێراق له سنوورى قه‌زاى پیرمام پشكنین بۆ چه‌ند جۆرێك تۆوى گژوگیا ده‌كه‌ن و نوێنه‌رێكی دارستان و پاوانى هه‌ولێریش ده‌ڵێت، ده‌یانه‌وێت ئه‌و جۆره گژو گیایانه كۆگا بكه‌ن و له ناوچه‌كانى خۆیان بیچێننه‌وه.
لیژنه‌كه‌ى وەزارەتی کشتوکاڵی عێراق له فەرمانگەی پڕۆژەی پاراستن و پشکنینی تۆی گژوگیا هاتبوون و پرۆژەی “حاجی ئاغا”یان لە گوندى گردەچاڵى سنوورى قه‌زاى پیرمام به‌سه‌ركرده‌وه.
عه‌بدولغه‌فور مه‌لا ته‌ها، نوێنه‌رى به‌ڕێوه‌به‌رایه‌تى دارستان و پاوانى هه‌ولێر، كه یاوه‌رى ئه‌م لیژنه‌یه‌ی به‌غدا بوو به 964ـى وت، لیژنه‌كه بۆ پشكنین و دیاریكردنى چه‌ند جۆره تۆوێكی گژوگیا هاتبوون و ده‌یانه‌وێت ئه‌و جۆره گژوگیایانه له‌ناو نه‌چن و په‌ره‌ى پێده‌ن.
وتیشی “به‌شێكی تۆوى ئه‌و گژوگیایانه له بانكى تایبه‌تى كشتوكاڵى به‌غدا ده‌پارێزرێن و به‌شێكی دیكه‌ش له‌و شوێنه تایبه‌تانه‌یان ده‌چێندرێنه‌وه كه تایبه‌تن به په‌ره‌پێدانى رووه‌كى، له‌وانه‌ش كێڵگه‌ى ئه‌بوغرێب.
به‌قسه‌ى ئه‌و نوێنه‌ره‌ى دارستان و پاوانى هه‌ولێر، پێشتریش ئه‌م لیژنه‌یه سه‌ردانى هه‌رێمى كوردستانیان كردووه و چه‌ند ناوچه‌یه‌كی جیاجیایان له هه‌ولێر و سلێمانى و كۆیه به‌سه‌ركردووه‌ته‌وه و پشكنینیان بۆ گژوگیاكان كردووه.
ئه‌وه‌شى ئاشكرا كرد، كه پێشتر چه‌ند جارێك حكومه‌تى هه‌رێمیان له دروستكردنى بانكى رووه‌كى له هه‌رێمی كوردستان ئاگادار كردووه‌ته‌وه و نووسراوى فه‌رمیان ئاڕاسته كردوون، به‌ڵام ده‌ڵێت “تاوه‌كو ئێستاش هیچ وه‌ڵامێكیان نه‌بووه”.
