ئەو دوو چەکە چین ئیسرائیل بەکاریان دەهێنێت؟

عادل کانەبی

بۆ یەکەمجار ئیسرائیل لە شەڕەکەیدا لەگەڵ حەماس جۆرە چەکێک بەکاردەهێنێت کە پێشتر نەزانراوە شتی وای هەیە.

چەکی بوومەلەرزەیی و چەکی ئیسفنجی ئەو دوو چەکە نوێیەن کە ئیسرائیل گرەویان لەسەر دەکات.

ئەو شەڕەی لە نێوان ئیسرائیل و حەماسدا بەڕێوەدەچێت هیچ هاوسەنگی تێدا نییە، یەکێک لە زەبەلاحترین هێزەکانی دونیا دژی گروپێک شەڕ دەکات کە نە لەرووی توانای مرۆیی نە لەرووی چەک و تەقەمەنییەوە بەراورد ناکرێن.

ئیسرائیل لە پلەی هەژدەهەمینی سوپاکانی جیهاندایە، 646 هەزار سەربازی هەیە، ئەو هێزە مرۆییە پاڵپشتە بە 601 فڕۆکی جەنگی و 220 تانک و زرێپۆشی هەیە

بۆمبی ئیسفنجی نە ئاگری تێدایە نە بارووت و تی ئێن تی، بەڵکو لە مادەیەکی کیمیایی تایبەت دروست بووە، هەر کە ئامانجەکەی پێکا یەکسەر وەک فووم هەڵدەکفێت، ئەمە بۆ ئەوەیە دەروازەی تونێلەکان دابخات و چەکدارانی حەماس رێی دەربازبوونیان نەمێنێت.

موشەکی بوومەلەرزەیی چەكێكی دیکەیە، ئەمەیان لە بەرزییەکی زۆرەوە فڕێ دەدرێت و دەگاتە قوڵایی زەوی ئینجا دەتەقێتەوە، ئەمەشیان هەر بۆ تونێلەکانە، هەرچی لەناو تونێلدایە بە سەر یەکدا تێک و پێکی دەشکێنێت، بەڵام گوڕەکەی ئەوەندە زۆرە لەسەر زەویش زەمینلەرزە دروست دەکات.