دیمەنی ئەو مینەی تەقیوەتەوە لە شاخی شەمێران. وێنە. دەستگای گشتی مین
لە شاخی شەمێران
بۆ کۆکردنەوەی ئاسن رۆیشتبوون بەڵام مین پێیاندا تەقیەوە
964+
توانا نەقی
بەهۆی رووداوی تەقینەوەی مین لە سنووری پارێزگای هەڵەبجە سێ هاوڵاتی بریندار بوون و دەزگای مین دەڵێت، دووانیان برینەکەیان سەختە.
دەزگای گشتی کاروباری مین بڵاویکردەوە، دوێنێ یەکشەممە رووداوەکە لە گوندی وەرمن لە شاخی شەمێران لە ناحیەی سیروان روویداوە.
هەرسێ هاوڵاتیە بریندارەکە دانیشووی قەزای دەربەندیخانن و رەوانەی نەخۆشخانە کراون و لە ژێر چاودێری پزیشکیدان.
عه‌لى میران به‌ڕێوه‌به‌رى گشتیى كاروبارى هونه‌رى له ده‌زگاى مین، به964ـى راگه‌یاند، ئەو سێ کەسە هاوڵاتی ئاسایی بوون و بەپێی زانیارییەکان بۆ کۆکردنەوەی ئاسن چوونەتە ئەو شوێنە لە شاخی شەمێران و مین پیاندا تەقیوەتەوە.
وتیشی، ئەو جێگەیە کێڵگەیەکی مەترسیداری مینە کە کاریان تیادا کردووە، بەڵام بەهۆی فراوانییەوە تا ئێستا کۆنترۆڵ نەکراوە و پێویستی بە کاری زیاترە.
عەلی میران وتی، ئەمڕۆ سەردانی شوێنەکە دەکەن و لە تەندروستی بریندارەکانیش دەپرسن، یەکێکیان بارودۆخی باشە و دووانییان برینەکانیان سەختە.