189 ملیۆن دیناری تێدەچێت
شەقامەکانی سۆران سەوز دەکرێن
964+
ئاکام غەفور – سۆران
بەمەبەستی زیادکردنی رێژەی سەوزایی شاری سۆران، پرۆژەیەک لەسەر روبەری 20 هەزار مەتر دووجا جێبەجێدەکرێت و ناوەڕاستی بەشێک لە شەقامەکان سەوز دەکرێن.
بڕی 189 ملیۆن دینار بۆ پرۆژەکە تەرخانکراوە و ئەمڕۆ سێشەممە، ئامادەکارییەکان بۆ سەوزکردنی شەقامی جوتسایدی دێلزیان بە درێژی سێ کیلۆمەتر دەستیپێکرد.
موهەندیس رێکان عەبدوڵا، سەرپەرشتیاری پرۆژەکە بە 964ـی وت، ”لە هەوڵداین رێژەی سەوزایی شارەکە بەرز بکەینەوە، لە دێلزیان دوای رێکخستنەوەی شەقامەکە ئامادەمان کردوە بۆ سەوزکردن، ئەو فریزەی بەکاریدەهێنین فریزی چوار وەرزیە هەوڵمانداوە باشترین جۆری فریز بەکاربهێنین”.
وتیشی، لە ناو بازار رووبەری نۆ هەزار مەتر دووجایان سەوزکردووە و لە دوای شەقامی دێلزیان دەچن بۆ شەقامی جوندیان و ئەوێش سەوز دەکەن.
بە پێی ئامارێکی دەستەی ژینگەی هەرێم، رێژەی سەوزای سۆران لە %4 تێپەڕناکات، کەمترە لە رێژەی ستاندار کە دەبێت لە %15 کەمتر نەبێت.
پێداچوونەوە: هاوبەش ئەبوبەکر
