ئەپڵ سەری خستووەتە سەر ئیلۆن مەسک و ناوی تویتەر ناگۆڕێت

964+

عادل کانەبی

ئەپڵ رەتیکردەوە ناوی تویتەر لە ئەپڵ ستۆر بگۆڕێت بۆ X چونکە بە گوێرەی یاساکانی ئەپڵ ناوی هەر ئەپلیکەیشنێک نابێت لە دوو پیت کەمتر بێت و بەو پێیەی ناوە تازەکەی تویتەر لە یەک پیت پێکدێت کێشەی بۆ مەسک دروستکردووە و خەریکە ریسەکەی دەبێت بە خوری.

دوای ئەوەی ئیلۆن مەسک خاوەنی کۆمپانیای تویتەر ناوی تۆڕی کۆمەڵایەتییەکەی لە تویتەرەوە بۆ ئێکس گۆڕی، ئێستا لەگەڵ کۆمپانیای ئەپڵ تووشی کێشە بووە بەهۆی ئەوەی یاساکانی ئەپڵ رێگە بەوە نادات کە ناوی هیچ ئەپێک لە ئەپڵ ستۆر لە دوو پیت کەمتر بێیت و بەو پێیەی ناوە تازەکەی تویتەر لە یەک پیت پێک دێت.

بۆ مەسک گۆڕینی ناوی ئەپەکەی لە گووگڵ پلەی ئاسانتر بوو بەو پێیەی دوای چەند رۆژێکی کەم لە گۆڕینی ناوی تویتەر لە بازاڕەکانی گووگڵ پلەی راستەوخۆ بەبێ بوونی هیچ کێشەیەک گۆڕدرا .

گۆڕینی ناوی تویتەر دوای ئەوە دێت کە کۆمپانیای مێتا ئەپێکی نوێی بە ناوی سرێدز بۆ رکابەرایەتیکردنی تویتەر خستە بەردەست بەکارهێنەران، کە لە پێنج رۆژی دەستپێکیدا 100 ملیۆن بەکارهێنەری ئینستاگرام ناوی خۆیان تێیدا تۆمارکرد و بە رکابەرێک بۆ تویتەر سەیرکرا، چونکە ئەویش بە هەمان شێوەی تویتەر رێگە بە بەکارهێنەر دەدات نووسین بڵاوبکاتەوە.