ئاسایشی هەولێر كەسێكی بە تۆمەتی تەقەكردنی هەڕەمەكی دەستگیركرد

964+

كوردستان ئەحمەد

ئاسایشی هەولێر هەڵمەتێكی بۆ دەستگیركردنی ئەو كەسانە دەستپێكرد كە بە هەڕەمەكی تەقە دەكەن و چەكی بێمۆڵەت هەڵدەگرن.

هەڵمەتەكە ئەمڕۆ شەممە 8.7.2023 دەستیپێكردووە، سەرەتا كەسێكیان لە ناو هەولێر دەستگیركرد كە بە هەڕەمەكی تەقەی كردووە و چەكەكەشی بێ مۆڵەتبووە.

مقەدەم ئەردەڵان، وتەبێژی ئاسایشی هەولێر بە 964ی راگەیاند، هەڵمەتەكە لە هەولێر بەردەوام دەبێت، فراوانتردەبێت و قەزاو ناحیەكانیش دەگرێتەوە، لە ماوەی داهاتوودا لە چەند ناوچەیەكی دیكە ئەم هەڵمەتە بەردەوامی هەیە.

وتیشی، هەر كەسێك بە هەڕەمەكی تەقە بكات دەستبەجێ دەستگیردەكرێت، چەكەكەشی دەستی بەسەردا دەگیرێت و رووبەڕووی دادگا دەكرێتەوە.

وادەی کۆتایی بۆ تۆمارکردنی ئەو چەکانەی لای هاوڵاتییە تا 21.7.2023 دەبێت، لە دوای ئەو بەروارەوە سزاکان قورستر دەبن.