نۆبەرەی نۆك لە شارەزوور رنرایەوە

964+

كوردستان ئەحمەد

نۆبەرەی نۆك لە شارەزوور لە لایەن جوتیارانەوە بە هەرەوەزی رنرایەوە.

لە زەوییەكانی شارەزوور دوو جۆر نۆك بەرهەمی باشی هەیە، نۆكی وردی رەنگ زەرد و نۆكی گەورەی سپی، كە بەشێوەی دێمەکاری بەرهەم دێت و تەنیا پێویستی بە چاندن و رنینەوە هەیە.

لە ناوەڕاستی مانگی چواردا دەچێنرێت و لە كۆتایی مانگی شەش دەڕندرێتەوە، دەبێت لە سەرەتاكانی مانگی پێنجدا بژار یان دەرمانی سەوزی بڕ بكرێت.

بژاركردن واتە دەرهێنان و لەناوبردنی ئەو گژوگیایەی كە لەنێوان نۆكەكاندا سەوز بوون و زیان بە گەشە و بەهەرمی نۆكەكە دەگەیەنن.

ئەمساڵ لە شارەزوور زیاتر لە 30 هەزار دۆنم زەوی بە نۆكی ورد و گەورە داچێندراوە.

لە هەندێك شوێن كە نۆكەكە باڵای بەرزترە، بە دەڕاسە كۆ دەكرێتەوە، بەڵام لە زۆربەی زەوییەكانی شارەزوور نۆك بە دەست و لە رێگەی تیمێكی هەرەوەزییەوە دەڕنرێتەوە.

نۆك یەكجار بەرهەمدەدات، كرێكارەكان لە بنەوە دەریدەهێنن و كۆیدەكەنەوە و دەیكەن بە مەڵۆ، پاش وشکكردنەوە و لەبەر خۆر داخستنی، دەخرێتە بەر هەباشە و پاكدەكرێتەوە لە پووشوپەڵاشەكەی.

نۆك بە یەكێك لە خۆراكە سەرەكیكەكانی مرۆڤ دادەنرێت و لەگەڵ چەند بەرهەمێكی دیكەدا ئاسایشی خۆراك پێكدەهێنن.

رنینەوەی نۆك لە دەشتی شارەزور، ئەم وێنانە جەمال سەرگەتی رۆژنامەنوس گرتویەتی.