کارکردن لە بەنداوی سبنەی دهۆک خێراتر دەکرێت

964+
توانا نەقی
کارکردن لە بەنداوی سبنە دوو لە پارێزگای دهۆک بەردەوامە و بڕیار دراوە دوو شەفت کاری تێدا بکرێت بە مەبەستی زوو تەواو بوونی.

بەنداوەکە دووەم بەنداوی بچوکە لە سنوری پارێزگای دهۆک، کە کاری تەواو بوونی نزیک بووەتەوە لە دوای بەنداوی خنس  لە سنوری قەزای شێخان.

بەنداوەکە بە گوژمەی حەوت ملیار دینار لە سەر بودجەی پەرەپێدانی وەزارەتی کشتوکاڵ و سەرچاوە ئاوییەکان کارکردن تیایدا بەردەوامە.

فەرهاد محەمەد، بەڕێوەبەری بەنداوی دهۆک لە پەڕەی فەرمی بەڕێوەبەرایەتی بەنداوی دهۆکەوە رایگەیاندووە، کۆمپانیای جێبەجێکاریان راسپاردووە ژمارەی ئامێرەکانی کارکردن زیاد بکەن و دوو شەفت کار بکەن بۆ ئەوەی هەرچی زووە تەواو بێت.

بەنداوی سبنە دوو، توانای گلدانەوەی نزیکەی شەش ملیۆن مەتر سێجا ئاوی هەیە.

کارکردن لە پرۆژەکە لە ساڵی 2015 وەستا بوو کە تا ئەوکاتە 43%ی کارەکانی تەواو بوون.