ئاوەڕۆی سندوقی چارەسەرە بۆ کێشەی لافاو لە چەمچەماڵ

ئەحمەد مستەفا

داواکاریی 330 خێزانی شاری چەمچەماڵ بۆ چارەسەرکردنی کێشەی لافاو لە بەردەم قایمقامیەت، گەڕەکی پورە گوڵە و ناوچەی سەرشەقام، بەرەو جێبەجێکردن دەچێت.

لە چوارچێوەی ئەم پرۆژەیەدا، بڕیارە ئاوەڕۆیەکی سندوقی کۆنکرێتی بە پێوانەی 2 بە 3 مەتر و بە درێژیی زیاتر لە 2 کیلۆمەتر دروست بکرێت، بۆ کەمکردنەوەی کێشەی کۆبوونەوەی ئاو و لافاو لەو ناوچانەدا.

قایمقامیەتی چەمچەماڵ ئەمڕۆ پێنجشەممە رایگەیاند، ئەم پرۆژەیە لەسەر داواکاریی هاوڵاتیان دەستی پێکردووە، شارەوانی چەمچەماڵ، بە هاوکاری کۆمسیۆنی بوژانەوە و فریاگوزاریی چەمچەماڵ، ئەم پرۆژەیەی خستووەتە ئەولەویەتی کارەکانی.

بەپێی راگەیەندراوەکە، رووپێوی و دیزاینی پرۆژەکە تەواو بووە و کۆمپانیای ئەشکان و جیۆ دیزاین ئەم ئەرکانەی ئەنجام داوە، هەروەها، پرۆسەی تەندەر لە پارێزگای سلێمانی تەواو بووە و چاوەڕوان دەکرێت لە ماوەیەکی نزیکدا دەست بە جێبەجێکردنی پرۆژەکە بکرێت.

وێنەکان: ژمارەیەک لە واژۆی ماڵەکان و داواکاری قایمقامیەتی قەزاکەیە