بانکی ناوەندی سیستەمێکی ئەلیکترۆنی بۆ گۆڕینەوەی دراوی زیانلێکەوتوو خستەکار

ئەحمەد مستەفا

بانکی ناوەندی عێراق، ئەمڕۆ یەکشەممە رایگەیاند، سیستەمێکی ئەلیکترۆنی نوێی بۆ گۆڕینەوەی دراوە زیانلێکەوتووەکان دروست کردووە، بە مەبەستی ئاسانکردنی رێکارەکان و خێراترکردنی خزمەتگوزارییەکە بۆ هاوڵاتییان.

بانکەکە لە راگەیەندراوێکدا ئاماژەی بەوە کردووە، هاوڵاتییان دەتوانن لە رێگەی پلاتفۆرمی ئەلیکترۆنی “ئور” داواکاریی گۆڕینەوەی دراوە زیانلێکەوتووەکان پێشکەش بکەن، بەوەی زانیارییە داواکراوەکان تۆمار بکەن و داواکارییەکەیان پشتڕاست بکەنەوە.

دواتر، لایەنە پەیوەندیدارەکانی بانکی ناوەندی رێکارەکانی تەواوکردنی پرۆسەی گۆڕینەوەکە دەگرنە ئەستۆ.

بەپێی راگەیەندراوەکە، ئەم هەنگاوە لە چوارچێوەی پرۆژەی دیجیتاڵکردن و پەرەپێدانی خزمەتگوزارییەکانی بانکدا دێت، کە ئامانجی کەمکردنەوەی کات و ماندووبوونی هاوڵاتییان و باشترکردنی کارایی خزمەتگوزارییە بانکییەکانە.

چۆن داواکاری پێشکەش بکەیت؟

هاوڵاتی کە خواستی سوودمەندبوون لەم خزمەتگوزارییەی هەیە، دەتوانێ لە رێگەی ئەم بەستەرەوە داواکارییەکانیان پێشکەش بکەن:

– بەستەری داواکاریی گۆڕینەوەی دراو: https://currency.app.cbi.iq/
– رێنماییەکانی گۆڕینەوەی دراوە زیانلێکەوتووەکان: https://cbi.iq/page/86

بە قسەی بانکی ناوەدندی، ئامانجی ئەم سیستەمە نوێیەی بریتییە لە ئاسانکردنی خزمەتگوزارییەکە و رێکخستنی پرۆسەی گۆڕینەوەی دراوە زیانلێکەوتووەکان بە شێوەیەکی خێراتر و کاریگەرتر.