داخستنی کۆڕەک بەردەوامە و گەشتە ئاسمانییەکانی نێوان نەجەف و فڕۆکەخانەکانی ئێرانیش دەستیانپێکردەوە

ژووری هەواڵ

لە دوێنێ شەوەوە تا ئەم بەرەبەیانییە هەرچی هەواڵ و پێشهاتی گرنگی ناوخۆ و دەرەوە هەیە کورت و پوخت لێرە بیخوێنەوە؛

📌کۆمپانیای کۆڕەک تیلیکۆم لە راگەیەندراوێکدا رایگەیاند، دادگای بەرایی رەسافە لە بەرژەوەندیی ئەوان بڕیاری داوە و بەپێی بڕیارەکە، هەڵوەشاندنەوەی تاکلایەنەی گرێبەستەکە لەلایەن دەستەی راگەیاندن و گەیاندنی عێراقەوە هەڵوەشاوەتەوە و گرێبەستەکەی نێوانیان دووبارە کارا کراوەتەوە

📌دەستەى راگەیاندن و گەیاندنى عێراق، وەڵامى کۆمپانیاى کۆڕەک تیلیکۆمى دایەوە و وتی، داخستنی کۆڕەک بەردەوام دەبێت، تا بڕیارێکی روونی دادگا دەردەچێت و کۆڕەک هەر نووسینگەیەک بکاتەوە لێپێچینەوەی لەگەڵ دەکرێت

📌هێڵی ئاسمانیی عێراقی گەشتە ئاسمانییەکانی نێوان نەجەف و فڕۆکەخانەکانی ئێرانی دەستپێکردەوە.

📌سەباح نوعمان وتەبێژی فەرماندەی گشتی هێزە چەکدارەکانی عێراق رایگەیاند، هیچ بنکەیەکی سەربازیی بیانی لەسەر خاکی عێراق نییە و هێزە ئەمنییەکانی خۆمان لە سەرتاسەری عێراقدا جێگیرکراون و دوای ئەمەش پەیوەندیمان لەگەڵ هاوپەیمانی نێودەوڵەتی دەگۆڕێت بۆ هاوبەشییەکی دوولایەنەی جیاواز

📌ئاژانسی “سانا” بڵاویکردەوە، بەهۆی کردەوەیەکی تێکدەرانەوە، ئاگر لە هێڵێکی گواستنەوەی غاز لە نێوان ناوچەی شوڵا و شاری دێرەزوور کەوتووەتەوە.

📌ئاژانسی هەواڵی ئێران بڵاویکردەوە، دەنگی تەقینەوەیەک لە دوورگەی قشم بیستراوە

📌”مارکۆ رۆبیۆ”ی وەزیری دەرەوەی ئەمریکا هۆشداری دا، هەر هێرشێکی ئێران بۆ سەر بەرژەوەندییەکانیان، کاردانەوەی توندی لێدەکەوێتەوە.

📌مارکۆ رۆبیۆ بە کەناڵی فۆکس نیوز: ئەمریکا بەردەوام دەبێت لە پاراستنی گەرووی هورمز.

📌وەزیری دەرەوەی ئێران رایگەیاند، لەگەڵ نێوەندگیەرەکاندا گفتوگۆیان کردووە لەسەر کۆمەڵێک پێشنیار بۆ ئەوەی پێشکەشی ئەمریکای بکەن.

📌ماڵپەڕی “ئەکسیۆس” لە زاری بەرپرسێکی ئەمریکییەوە بڵاویکردەوە، ترەمپ ئامادەیە لە بەرامبەر پێشکەوتنی راستەقینە لە دۆسیەی ئەتۆمیدا، سزاکانی سەر ئێران کەم بکاتەوە و پارە بلۆککراوەکانیشیان بۆ ئازاد بکات.

📌دۆناڵد ترەمپ رایگەیاند: هیچ پێشنیارێکم بۆ ئێران نەکردووە و راپۆرتەکەی ئەکسیۆس درۆیە.

📌ترەمپ ئەو دەنگۆیانەشی رەتکردەوە کە گوایە پێشنیاری فرۆشتنی چەکی ئەمریکی بە “شی جین پینگ”ی سەرۆکی چین کردبێت، ئەوەش دوای ئەوەی لێدوانێکی باڵیۆزی ئەمریکا لە پەکین مشتومڕێکی زۆری دروست کرد.

📌رۆژنامەی “وڵ ستریت جورنال” بڵاویکردەوە، گواستنەوەی نەوت لە رێگەی گەرووی هورمز و رێگە جێگرەوەکانیدا گەیشتووەتە نزیکەی %80ـی ئاستی پێش دەستپێکردنی جەنگ.

📌میدیاکانی ئەمریکا ئاشکرایان کردووە، سەرەڕای بوونی گفتوگۆی ئەرێنی لە رێگەی نێوەندگیەرەکانەوە، بەڵام واشنتن بەهۆی کردەوەکانی پێشووی ئێران گومانی لە جدیبوونی هەیە. هەردوولا هێشتا لەسەر کاتی جێبەجێکردنی هەنگاوەکان ناکۆکن و تا دۆسیەی ئەتۆمی یەکلایی نەکرێتەوە، هیچ رێککەوتنێک ناکرێت.

📌کۆریای باکوور رایگەیاند، رەزامەندیی ئەمریکا لەسەر دروستکردنی ژێردەریایی ئەتۆمی لەلایەن سێئولەوە پەرەسەندنێکی مەترسیدارە و بەڵگەیەکی دیکەیە بۆ ئەوەی واشنتن چەکی ئەتۆمی بڵاو دەکاتەوە.

📌کەناڵی “ئەی بی سی نیوز”: کۆگایەکی گەورەی زانیارییەکانی کارمەندانی پێنتاگۆن کە زانیاریی هەستیاری تێدایە، هاککراوە.

📌وەزارەتی گەنجینەی ئەمریکا رایگەیاند، وەزیر بێسێنت داوای لە حکومەتی لوبنان کردووە ئەو تۆڕە داراییانە رابگرن کە سەر بە ئێران و حـ.*زبوڵـ.*ڵان.

📌سەرۆکی ئۆکراینا ڤۆلۆدیمیر زیلینسکی رایگەیاند، ئێستا زیاتر لە 8 هەزار سەربازی کۆریای باکوور لە رووسیا هەن و خۆشیان بۆ ناردنی 10 هەزاری تریش ئامادە کردووە.

📌ڤلادیمیر پوتینی سەرۆکی رووسیا فەرمانی بە زیادکردنی 15 هەزار و 500 سەربازی دیکە بۆ ناو سوپاکەی دا، کە ئەمە چوارەم بڕیارە لەو جۆرە لە سەرەتای ئەمساڵەوە دەری بکات.

📌وەزیری جەنگی ئەمریکا، پێت هێگسێت، چەند هەفتەیەک بەر لە رۆژی دەنگدان، پلانی پاراستنی هەڵبژاردنی نیوەی خولی کۆنگرێسی راگەیاند.

📌سوپای ئیسرائیل رایگەیاند، موشەکێکی بەرگرییان ئاراستەی “ئامانجێکی ئاسمانیی گوماناوی” کردووە کە بەسەر ناوچەیەکدا لە باشووری لوبنان دەرکەوتووە.

📌بەپێی هەواڵێکی ئاژانسی فرانس پرێس، سوپای ئەسیوپیا کۆنترۆڵی شارۆچکەی “ئالاماتا”ی لە هەرێمی تیگرای باکووری وڵاتەکە کرد.