پڕۆژەی رێگای نێوان شارباژێڕ و راپەڕین نیوەی زیاتری تەواو بووە

دیلان محەمەد جەزا – سلێمانی

پڕۆژەی دروستکردنی ئەو رێگایەی شارباژێڕ بە دەڤەری راپەڕین دەبەستێتەوە نیوەی زیاتری تەواو بووە و تا ئێستا تەنیا 3%ـی پارەکەی خەرج کراوە.

نەریمان عەبدوڵڵا، خاوەنی کۆمپانیای هێما کە جێبەجێکاری پڕۆژەکەیە، بە 964ـی راگەیاند، 53%ـی پڕۆژەکەمان تەواو کردووە و تەنیا 3%ـی پارەکەمان وەرگرتووە، داواکاریشین هاوکاری بکرێین و بودجەی 50%ـی پڕۆژەکەمان بۆ خەرج بکرێت، تاوەکو بتوانین بەردەوام بین لەسەر کارەکان.

وتیشی: ئەم رێگایە سێ مەرزی نێودەوڵەتی لەسەرە و ناوچەکە دەکاتە شوێنێکی گەشتیاری و دەیبوژێنێتەوە.

خاوەن کۆمپانیاکە وەکو خۆی باسی کرد، تەنیا 275 ملیۆن دیناری وەرگرتووە، لەکاتێکدا بە بڕی نۆ ملیار دینار کاریان لەم پڕۆژەیەدا کردووە و تێچووی گشتیی پڕۆژەکەش 16 ملیار دینارە.

پێداچوونەوە: هەژان هادی