سوپای ئەمریکا:
“هێرشەکانی ئێران بۆ سەر بەحرەین قبوڵکراو نییە و بێ وەڵام نامێنێتەوە”
964+
شۆڕش قادری
دوای ئەوەی سوپای پاسداران رایگەیاند، هێرشێکی چڕیان کردووەتە سەر بەحرەین و کوژراو و برینداری زۆری لێکەوتووەتەوە، فەرماندەی سێنتکۆم رایگەیاند، هێرشەکانی ئێران بۆ سەر بەحرەین قبوڵکراو نییە و بێ وەڵام نامێنێتەوە.
براد کوپەر، فەرماندەی فەرماندەیی ناوەندیی ئەمریکا (سێنتکۆم) لە راگەیەنراوێکدا بە توندی هێرشەکانی ئێران بۆ سەر بەحرەین شەرمەزار دەکات و دەڵێت، “رژێمی ئێران هێرشی کردووەتە سەر 12 وڵات و خەڵکی مەدەنی دەکاتە ئامانج، شەوی رابردوو هێزەکانیان حەوت درۆنی هێرشبەریان ئاراستەی گەڕەکە مەدەنییەکانی بەحرەین کردووە و ئەم رەفتارە قبوڵکراو نییە و بێ وەڵام نامێنێتەوە”.
ئەوەش دوای ئەوە دێت کە وتەبێژی قەرارگای “خاتەم ئەلئەنبیا”ـی سەربە سوپای پاسداران رایگەیاند، هێرشەکانیان بۆ سەر شوێنی جێگیربوونی هێزەکانی ئەمریکا لە وڵاتی بەحرەین، زیانی گەورەی گیانی بەدواوە بووە.
