کۆی گشتی گەیشتە 299 کەس
لە زیندانەکانی لێبیاوە بۆ هەرێم؛ 97 گەنجی دیکە گەڕێندرانەوە
964+
وریا فەتاح
حکومەتی هەرێمی کوردستان، ئەمڕۆ شەممە، شەشەمین کاروانی کۆچبەرانی کوردی لە وڵاتی لێبیاوە گەڕاندەوە، کە پێکهاتبوون لە 97 گەنج و زۆرینەیان خەڵکی سنووری ئیدارەی راپەڕینن.
ئەم گەنجانە لە کاتی هەوڵدانیان بۆ کۆچی نایاسایی بەرەو ئەوروپا، لە لێبیا دەستگیرکرابوون، گەڕاندنەوەیان لە رێگەی لێژنەیەکی هاوبەشی وەزارەتی ناوخۆ و فەرمانگەی پەیوەندییەکانی دەرەوە بووە، بە هەماهەنگی لەگەڵ باڵیۆزخانەی عێراق لە لێبیا.
ئامارەکان:
کاروانی ئەمڕۆ: 97 گەنج (زۆرینە دانیشتووی ڕاپەڕین و پشدەر).
کاروانی دوێنێ: 100 کۆچبەر گەڕێندرانەوە.
کۆی گشتیی رزگارکراوان: تا ئێستا 299 کۆچبەر لە لێبیاوە گەڕێندراونەتەوە هەرێم.
بەپێی ڕاگەیەندراوی حکومەت، هەندێک لەم گەنجانە بۆ ماوەی 8 مانگ لە بەندینخانەکانی لێبیادا بوون و لەو ماوەیەدا رووبەڕووی بارودۆخێکی تەندروستی و مرۆیی زۆر سەخت و مەترسیی مردن بوونەتەوە.
حکومەتی هەرێم ئاشکرای کردووە، کە ئێستا تیمێکی تایبەتی فەرمانگەی پەیوەندییەکانی دەرەوە لە ناو خاکی لێبیان و بەردەوامن لە گەڕان و رزگارکردنی ئەو کۆچبەرە کوردانەی تری کە هێشتا لەوێ ماون.
