جارێ پارەی بۆ تەرخان نەکراوە
پلانی دووسایدکردنی رێگەی نێوان سۆران و خەلیفان ئامادەیە
+964
ئاکام غەفور- سۆران
پێشنیار دەکرێت رێگەی گەلی عەلی بەگ لە خەلیفان تاکو سۆران بکرێت بە دوو ساید و بەشێکی دوو سایدەکەش بەشێوەی پرد لەسەر رووبارەکە دەبێت.
ئاگرین عەبدوڵا، بریکاری وەزارەتی ئاوەدانکردنەوە و نیشتەجێکردن، بۆ 964 باسی پرۆژەکەی کرد و دەڵێت، لەگەڵ لیژنەیەک لە ئەنجومەنی وەزیران و تیمێکی ئەندازیاری سەردانی رێگاکەمان کردووە، بۆ ئەوەی بیکەین بە دووساید، پرۆژەکەی ئامادەکراوە بەڵام پارەی بۆ دابین نەکراوە.
وەک باسی دەکات، یەکێک لە سایدەکانی دوو سایدەکە دەکەوێتە لای شاخەکە و بڕینی بۆ دەکرێت و سایدەکەی دیکەش دەکەوێتە سەر رووبارەکە و پردی بۆ دروست دەکرێت و دەشڵێت، ”ئەمە لە زۆر وڵات جێبەجێ کراوە و سەرکەوتووە”.
ئەوەی لە پلانی ئەوانە لەگەڵ دوو سایدەکە پردە کۆنەکانی رێگەکە بگۆڕن و پێجەکانیشی کەمتر بکەنەوە.
گەلی عەلی بەگ، رێگەی نێوان سۆران بۆ خەلیفانە و یەکێکە لە رێگە گرنگەکانی بازرگانی و گەشتیاری، بەردەوامیش قەرەباڵغە و جەنجاڵی هاتوچۆ دروست دەبێت.
پێداچوونەوە: ژێوار خدر
