باڵیۆزخانەی ئەمریکا لە بەغدا.
باڵیۆزخانە و كونسوڵخانە
ئەمریكییەكان دەگەڕێنەوە هەولێر و بەغدا
964+
ئەرسەلان عەبدوڵا
ویلایەتە یەكگرتووەكانی ئەمریكا رایگەیاند، فەرمانبەرانی باڵیۆزخانەی وڵاتەكە لە بەغدا و كونسوڵخانەی هەولێر، دەگەڕێنەوە سەر كاری خۆیان.
بەپێی هەواڵێکی ئاژانسی هەواڵی فەرمیی عێراق، “وەزارەتی دەرەوەی ئەمریكا لە راگەیاندراوێكدا ئەمڕۆ پێنجشەممە دووپاتی كردووەتەوە، فەرمانبەرانی ئەمریكی لە باڵیۆزخانەكەیان لە بەغدا و كونسوڵخانەكەیان لە هەولێر، دەگەڕێنەوە سەر كارەكانیان”.
هەرچەندە تا ئامادەکردنی ئەم هەواڵە ئەكاونتی فەرمی باڵیۆزخانەی ئەمریكا لە بەغدا و كونسوڵخانەكەیان لە هەولێر لەسەر تۆڕی ئێكس و فەیسبووك هیچ هەواڵێكی لەم جۆرەی پۆست نەكردووە، بەڵام ئەوەیان بڵاوكردووەتەوە، ئەمڕۆ باڵیۆز ستیڤن ڤاگن لە بەغدا لەگەڵ سەرۆك كۆمار لەتیف رەشید كۆبوونەوەی هەبووە و باسیان لە پێكەوەكاردنی نێوان هەردوو وڵات كردووە.
بەهۆی شەڕی 12 رۆژەی ئێران و ئیسرائیل لە مانگی رابردوو، فەرمانبەرانی باڵیۆزخانەی بەغدا و كونسوڵخانەی هەولێر چۆڵیان كرد و لە عێراق و كوردستان چوونەدەرەوە.
