سیانیان ئەندامی یەک خێزانن
رۆیشتن بۆ سەردانی پزیشک و تەرمەکانیان ھاتەوە
964+
میلاد جەلال – گەرمیان
خێزانێکی دانیشتووی کەلار، بەمەبەستی سەردانی پزیشک بەیانی ئەمڕۆ دەڕۆیشتن بۆ بەغدا، بەڵام لەرێگای خانەقین بۆ جەلەولا تووشی رووداوی ھاتووچۆ بوون و چوار کەس گیانیان لەدەستدا و کەسێکیش بریندارە.
عومەر محەمەد، برازای یەکێک لە مردووەکان بە 964ـى وت، “مامم لەگەڵ ژنەکەی و دوو منداڵەکەی چوون بۆ سەردانی پزیشک لە بەغدا، بۆ کچە شەش مانگەکەیان، بەڵام لەرێگا تووشی رووداوی ھاتوچۆ بوون و خۆی و ژنەکەی و یەکێک لە مندالەکانی و شۆفێری ئۆتۆمبێلی بەرامبەريش گیانیان لەدەستدا”.
“مامم و ژنەکەی و منداڵە شەش مانگەکە گیانیان لەدەستدا، منداڵەکەی دیکەشیان لە نەخۆشخانەیە و دۆخی تەندروستی باش نییە و نەشتەرگەری بۆدەکرێت”،عومەر محەمەد وای وت.
ئاماژەی بەوەش کرد، رووداوەکە کاتژمێر 6:00ـی بەیانی روویداوە، ئەوان لە کاتژمێر 7:00 پەیوەندییان پێوەکراوە و پێیان وتوون رووداوەکە روویداوە.
تەرمی پیاو و ژن و منداڵەکە ھێنرایەوە بۆ کەلار و لە گۆڕستانی گوندی بەرلوت بەخاکسپێردران.
پێداچوونەوە: ژێوار خدر
