تانکەرێک خۆی کێشاوە بە دوو ئۆتۆمبێلدا
لە رووداوی هاتوچۆکەی خانەقین سێ کەس گیانیان لەدەستداوە
+964
راژان باجەڵان – خانەقین
ئێوارەی ئەمڕۆ لە ئەنجامی رووداوێکی هاتوچۆ لە نێوان سێ ئۆتۆمبێل لە نزیک گوندی ناودۆمان لە دەروازەی باشوری خانەقین سێ کەس گیانیان لەدەستدا و کەسێکیش بریندارە.
دکتۆر شوان شاکر بەڕێوەبەری نەخۆشخانەی خانەقین بە 964ـی وت، بەهۆی رووداوەکە سێ کەس گیانی لەدەستداوە دووانیان پیاون و دانەیەکیان ژنە و ژنێکی تریش بریندارە.
پەیامنێری 964 لە شوێنی رووداوەکە رایگەیاند، زیاد لە کاتژمێر و نیوێکیان پێچووە ئینجا تەرمی سێیەمیان دەرهێناوە و سەدان کەس لە خەڵکی خانەقین لە شوێنەکە ئامادەبوون.
شایەتحاڵێک کە تەرمێکی گواستووەتەوە نەخۆشخانە بە 964ـی وت، رووداوەکە بەم شێوەیە بووە، تانکەرێک لە دەروازەی دەرچوونی خانەقینەوە لە دەستی وەرگرتووە و خۆی کێشاوە بە پیکابێکدا و دوو کەس لە پیکابەکەدا گیانیان لەدەستداوە، هەر بەوەوە نەوەستاوە چووتە سایدی بەرامبەر و خۆی کێشاوە بە کیا سپۆرتاجێکدا و لەویشدا کەسێک گیانی کەدەستداوە و کەسێکیش بریندارە.
پێداچوونەوە: توانا نەقی
