مەلا و پێشنوێژى گوندى گرێزە
بڕۆن بەدەم بانگەوازەکەى حکومەت بۆ رادەستکردنى چەکى بێمۆڵەت
964+
وریا فەتاح
مامۆستاى ئاینى گوندى گرێزە، ئەو گوندەى شەوى رابردوو کەسێک خۆیى و پێنج ئەندامى خێزانەکەى کوشت، داوا لە هاوڵاتیان دەکات بچن بەدەم بانگەوازەکەى حکومەت بۆ رادەستکردنى چەکى بێ مۆڵەت.
شەوى رابردوو لە گوندى گرێزەى سەربە قەزاى سەید سادق، کەسێک پێنج ئەندامى خێزانەکەیى و خۆشى کوشت.
لە کاتى بەخاکسپاردنى تەرمەکانیان، د.عوسمان گرێزەیی پێشنوێژ و مامۆستای مزگەوتی گوندی گرێزە بۆ 964 وتی،”ئەوەى روویداوە بەرەنجامى هەڵگرتنى چەکى بێمۆڵەتە”.
دەشڵێت: پێویستە هەمووان بەدەم بانگەوازەکەى حکومەت بچن و چەکە بێمۆڵەتەکانیان رادەست بکەن.
ئەو مامۆستا ئاینییە، باسى لەوەشکرد، هەڵگرتنى چەک بووە بە عەیبە.
درەنگانێکى شەوى رابردوو، گەنجێکى گوندى گرێزە کە دەوترێت دوو رۆژ بوو لە ئەورووپاوە گەڕابووەوە کوردستان، پێنج ئەندامى خێزانەکەی و دواتر خۆشى کوشت، ئەوانەی کوژراون، دایک، باوک، دوو خوشک و برایەکی بکوژ بووە، کە دواتر بکوژ کۆتایی بە ژیانی خۆشی هێناوە.
ئەوەى لە خێزانەکە ماوەتەوە، تەنیا دوو براو خوشکێکن، کە برایەکیان چووە بۆ میوەکڕین و براکەى تریان لەهەولێر بووە، خوشکێکیشیان شوى کردووە و لەماڵى خۆى بووە.
گوندى گرێزە، بەدوورى چوار کیلۆمەتر دەکەوێتە باکووری قەزای سەیدسادق لە سنوورى پارێزگاى سلێمانى
