"ملەی نەڵمە سەختە"
لەسەر رێگەی پێنجوێن؛ 33 تانکەر رۆنی رەشیان رشتووە
964+
کامیار کەمال- پێنجوێن
لە ساڵی 2024دا، لەسەر رێگای پێنجوێن 33 شۆفێری تانکەری سووتەمەنی دەستگیرکراون، بەهۆی رشتنی نەفتا و رۆنی رەش لەسەر رێگای سەرەکی قەزاکە.
964 لە دادگای بەرایی پێنجوێن ئاماری تەواوەتی ساڵی 2024ی وەرگرتووە و ساڵی رابردووش 33 شۆفێر و تانکەری سوتەمەنی بەهۆکاری رشتنی نەفتا و رۆنی رەش دەستگیرکراون و دوای وەرگرتنی سزاکەیان ئازادکراون.
لە بارەی هۆکارەکانی، عەقید هاشم عەبدوڵا لێپرسراوی هاتوچۆی پێنجوێن بە 964ی راگەیاند، بەشێکی زۆری ئەو تانکەرانە لە سەر هەورازەکەی ملەی نەڵمە نەفتا و رۆنی رەشیان رشتووە، چونکە هەورازێکی سەختە.
باسی لەوەشکرد، دوو کارمەندی هاتوچۆی پێنجوێن بەردەوام لە ناڵپارێز و ملەی نەڵمە هەن بۆ ئەوەی لە کاتی ئەو سەرپێچییە دەست بگرن بەسەر تانکەرەکەدا و شۆفێرەکە دەستگیربکەن و دواتر ئەوان رادەستی پۆلیسی دارستانی ئەکەن.
هاشم عەبدوڵا ئەوەشی خستەروو، بەگوێرەی یاسای هاتوچۆ سزای ئەو تانکەرانە کەمە و تەنها 40هەزار دینار غەرامە دەکرێن و بەڵام ئەگەر بە پێی یاسای ژینگە بێت ئەوا سزاکەیان زیاترە.
بەپێی ئەو زانیارییانەی دەست 964کەوتووە، ساڵی رابردوو تەنیا یەک رووداوی هاتوچۆ لە نزیک گوندی تەڕاتەوەن روویداوە بەهۆی رشتنی نەفتاوە و ئۆتۆمبێلک وەرگەڕا، بەڵام زیانی گیانی نەبوو.
پاتری نوێیان بۆ هات و کارتی نیشتمانی پێنجوێن کرایەوە
