پردەکە ساڵی 2014 داعش تەقاندییەوە
دوای 10 ساڵ پردە رووخاوەکەی زەرگە لە خورماتوو نۆژەن دەکرێتەوە
964+
سیروان خورشید – دوزخورماتوو
دوای 10 ساڵ پردە رووخاوەکەی زەرگە لە قەزای خورماتوو نۆژەن دەکرێتەوە، پردەکە ساڵی 2014 لەلایەن چەکدارانی داعشەوە تەقێنرایەوە.
زولفەقار حەیدەر قایمقامی خورماتوو بە 964ـی وت، “دوای چەندین ساڵ، بڕیاری نۆژەنکردنەوەی پردی زەرگە چووە بواری جێبەجێکردنەوە و بڕیارە لە دەستپێکی ساڵی نوێدا، کارکردن تێیدا دەست پێبکات”.
“نۆژەنکردنەوەی پردی زەرگە لە چوارچێوەی پڕۆژەکانی سندوقی ئاوەدانکردنەوە و بە تێچووی 61 ملیار دینار جێبەجێ دەکرێت”، زولفەقار حەیدەر وای وت.
باسی لەوەش کرد، دوو ساڵ لەمەوبەر شارەوانيی خورماتوو جادەیەکی کاتی لە تەنیشت پردە رووخاوەکە دروست کرد، بەڵام ئەوە چارەسەر نەبوو، چونکە لەکاتی بارانباریندا جادەکە ژێرئاو دەکەوێت و مەترسی بۆ سەر شۆفێران و هاوڵاتیان دروست دەکات.
پردی زەرگە بە دووری 20 کیلۆمەتر دەکەوێتە خۆرئاوای قەزای دوزخورماتوو، کە خورماتوو بە ناوچەکانی پارێزگای سەڵاحەدین دەبەستێتەوە.
ئێستا بەشێک لە شۆفێران بە ناچاری لە رێگای کەرکوکەوە دەچنە پارێزگای سەڵاحەدین، ئەوەش دووریان دەخاتەوە و بەراورد بە رێگای سەر پردی زەرگە، دوو کاتژمێر جیاوازی هەیە.
پێداچوونەوە: شۆڕش قادری
زیانلێکەوتووانی خورماتوو قەرەبوو دەکرێنەوە
