دیمهنێ ئاژهڵدارێك له كوێستانهكانى قهزاى چۆمان... وێنه: 964+
وه‌زاره‌تی كشتوكاڵ دایناوه
ئه‌وانه‌ى بۆ جه‌ژنى قوربان ئاژه‌ڵ سه‌رده‌بڕن پێویسته پابه‌ندی 13 رێنمایی بن
964+
فه‌رهاد حه‌سه‌ن
وه‌زاره‌تی كشتوكاڵی هه‌رێم، چه‌ند رێنماییه‌كى بۆ ئه‌و كه‌سانه داناوه كه له جه‌ژنى قورباندا سه‌رى ئاژه‌ڵ ده‌بڕن و پێویسته پابه‌ندی بن، یه‌كێك له‌و رێنمایی و رێكارانه ئه‌وه‌یه كه پێویسته لانیكه‌م 12 كاتژمێر گۆشتى ئاژه‌ڵه‌كه له‌ناو ساردكه‌ره‌وه هه‌ڵبگیرێت، ئینجا به‌كاربهێندرێت.
– پێویسته ئاژه‌ڵه‌كان له سه‌ربڕخانه‌ی فه‌رمی سه‌رببڕێن.
– له رۆژانی جه‌ژنی قوربان سه‌ربڕخانه‌كان كراوه بن به ئاماده‌بونی پزیشك و كارمه‌ندی ڤێتێرنه‌ری .
– ناوی سه‌ربڕخانه كراوه‌كان و كاتی كاركردن له میدیاكان و یه‌كه ئیداریه‌كان رابگه‌یه‌نرێت بۆ ئه‌وه‌ی هاوڵاتیان ئاگاداربن و ئاژه‌ڵه‌كانیان له‌م سه‌ربڕخانانه سه‌رببڕن.
– جه‌ختكردنه‌وه و توند و تۆڵكردنه‌وه‌ی رێكاره‌كانی پشكنینی پێش سه‌ربڕین و دوای سه‌ربڕینی ئاژه‌ڵ و پشكنینی گۆشتی به‌رهه‌م هاتوو.
– په‌یڕه‌وكردنی رێنماییه‌كانی خۆپارێزی وه پاك و خاوێن ڕاگرتنی سه‌ربڕخانه‌كان و ده‌وروبه‌ری سه‌ربڕخانه‌كان وه رشاندنیان به ده‌رمانی تایبه‌ت .
– پێویسته ئاژه‌ڵه‌كه ساغ بێت و هیچ نیشانه‌یه‌كی نه‌خۆشی نه‌بێت و گه‌نه (قڕنه) و مشه‌خۆری ده‌ره‌كی له‌سه‌ر نه‌بێت .
– هه‌ر ئاژه‌ڵێك ده‌رمانی چاره‌سه‌ركردنی پێدرابێت نابێت راسته‌وخۆ سه‌رببڕدرێت به‌ڵكو پێویسته كاتی سه‌ربڕین و دوای به‌كارهێنانی ده‌رمان به پێی رێنمایی پزیشكی ڤێتێرنه‌ری و تایبه‌تمه‌ندی ده‌رمانه‌كه بێت.
– پێویسته له‌سه‌ر خاوه‌ن ئاژه‌ڵ پێش فرۆشتنی ئاژه‌ڵه‌كانی (بۆ سه‌ربڕین یان قوربانیكردن) به ماوه‌ی نزیكه‌ی سێ هه‌فته هیچ جۆره ده‌رمانێك نه‌دات به ئاژه‌ڵه‌كان و هۆڵی به‌خێوكردنی ئاژه‌ڵه‌كان به‌ده‌رمانی تایبه‌ت بڕشێنێت و چاره‌سه‌ری ئاژه‌ڵه نه‌خۆشه‌كانیشی بكات .
– پێویسته له‌سه‌ر كه‌سی قوربانیكه‌ر (قه‌صاب و هاوڵاتی) به گرتنه‌به‌ری گشت رێكاره‌كانی خۆپارێزی و پاك و خاوێنی له‌كاتی سه‌ربڕینی ئاژه‌ڵ و گۆشت ئاماده‌كردن ، به‌تایبه‌تی به‌كارهێنانی ده‌ستكێش جزمه‌و صدریه .. هتد، دوركه‌وتنه‌وه له كۆبونه‌وه له‌ده‌وروبه‌ری ئاژه‌ڵ له‌كاتی سه‌ربڕین، هه‌روه‌ها شوشتن و ته‌عقیمكردنی شوێنی سه‌ربڕین، ده‌ست و كه‌لوپه‌له‌كان دوای به‌كارهێنان و ده‌ستدان له گۆشت.
– به‌كارهێنانی كیسی (نایلۆن) ی نوێ و رون و بێڕه‌نگ له‌كاتی دابه‌شكردنی گۆشت.
– له‌كاتی گواستنه‌وه‌ی گۆشت ره‌چاوی پله‌ی گه‌رمی گونجاو بكرێت.
– هه‌ڵگرتنی گۆشت بۆ ماوه‌ی 12 تاوه‌كو 24 كاتژمێر له‌ساردكه‌ره‌وه، پاشان به‌كاربهێنرێت.
– فڕێنه‌دانی پاشماوه‌ی سه‌ربڕین و ئاژه‌ڵ له سه‌ر شه‌قام و كۆڵان و بازاڕه‌كان ……..هتد.
