ناوی سێ یەکەمەکان دەچێتە بەردەم واژۆی حکومەتی هەرێمی کوردستان

964+
ئەحمەد مستەفا

وەک هەواڵێکى دڵخۆشکەر بۆ سێ یەکەمەکان، وەزارەتی خوێندنی باڵا رایگەیاند، سبەی سێشەممە بە مەبەستی دامەزراندن، لیستی ناوی سێ یەکەمەکانی زانکۆ و پەیمانگەکان ئاراستەی حکومەتی هەرێمی کوردستان دەکات.

بە قسەی وتەبێژی وەزارەتی خوێندنی باڵا، ناوەکان لیستی یەکەمەکانی ساڵی خوێندنی 2017-2018 بۆ 2022-2023ی تێدایە.

ئەمڕۆ دووشەممە 27.5.2024، عەباس ئەکرەم وتەبێژی وەزارەتی خوێندنی باڵا و توێژینەوەی زانستی بە 964ی وت، “وەزیرى خوێندنى باڵا لایەنە تایبەتمەندەکانی وەزارەتەکەی راسپاردووە بۆ خێراکردن لە ئامادەکاری و هەماهەنگی بۆ دامەزراندنى سێ یەکەمەکان”.

ئەمڕۆ لە دیوانی وەزارەتەکەشی ئارام محەمەد قادر، وەزیری خوێندنى باڵا کۆبونەوەیەکى تایبەتی لەگەڵ لایەنە پەیوەندارەکان ئەنجامداوە بۆ هەنگاوە کۆتاییەکانی ئامادەکاری و هەماهەنگی بۆ دامەزراندنى یەکەمەکان.

لە کۆبوونەوەکەدا، وەزیری خوێندنی باڵا وتوویەتی، “دامەزراندنى سێ یەکەمەکان بە ئەرکى لە پێشینەى وەزارەتەکەی زانیوە”، باسی لەوەش کردووە، “لەم قۆناغەدا پێویستە هەموان پێکەوە هەماهەنگ و هاوکارى یەکتر بن، بۆ ئەوەى مافى هیچ یەکێک لە سێ یەکەمەکان نەفەوتێ، بۆیە دەبێ لە تۆمارکردنى ناوى چواریان و بەشەکانیان و تەواوى زانیارییەکان ورد بن و نابێت هیچ چۆرە کەمتەرخەمییەک لەم رووەوە هەستى پێ بکرێت”، ئەوەش بە گوێرەی راگەیەندراوی کۆبوونەوەکە.

لە هەرێمى کوردستان، ساڵانى رابردوو سێ یەکەمەکانى ساڵانى (2015-2016) و (2016-2017) دامەزران.

وەزارەتی خوێندنی باڵا: هەوڵی دامەزراندنی سێ یەکەمەکان دەدەین