ئەو کارگەیەی سکاڵای لەسەر تۆمار کراوە - وێنە: فەرمانگەی ژینگەی هەڵەبجە
ژینگەی هەڵەبجە ئاگاداری دەکاتەوە
سکاڵا لەسەر کارگەیەکی چیمەنتۆی ئامادەکراو تۆمار دەکرێت
964+
پێشەوا محەمەد
لە هەڵەبجە هاوڵاتیان سکاڵا دەبەنە فەرمانگەی ژینگە تا لە دوکەڵی کارگەیەکی چیمەنتۆی ئامادەکراو رزگاریان بکەن، فەرمانگەکەش بەدواداچوون بۆ سکاڵاکە دەکات.
بەپێی بەدواداچوونی فەرمانگەکە، دوکەڵەکە بە شێوەیەکی هەمیشەیی نەبووە و رۆژانە یەک جار لە کاتی پاککردنەوەدا ئەو دوکەڵەی دەرکردووە.
سەرهەنگ عەبدولڕەحمان، بەڕێوەبەری فەرمانگەی ژینگەی هەڵەبجە بە 964ـی راگەیاند، هەرکات سکاڵای ژینگەیی لای ئەوان تۆمار بکرێت راستەوخۆ بەدواداچوونی بۆ دەکەن و لیژنەی سەرپێچیشیان چوونەتە ئەو کارگەیە.
وتیشی، “دوکەڵەکە بە شێوەی هەمیشەیی نەبووە، بەڵام ئەوەی کە هەشیبووە هەر سەرپێچیی ژینگەییە و دەبێت ئەو دوکەڵە بە هیچ شێوەیەک نەهێڵێت”.
فەرمانگەی ژینگەی هەڵەبجە سەرپەرشتیاری ژینگەیی لە کارگەکان دامەزراندووە و ئەوەش یارمەتیی فەرمانگەکەی داوە سەرپێچییە ژینگەییەکان کەمتر بن.
“سەرەتا کارگەکان ئاگادار دەکەینەوە و بەڵێننامە بە خاوەنەکانیان پڕدەکەینەوە سەرپێچی نەکەن، ئەگەر دووبارەیان کردەوە سزای مادییان دەدەین و دایاندەخەین”، بەڕێوەبەری فەرمانگەی ژینگەی هەڵەبجە وای وت.
