بەدواداچوونی 964
تانکەرێکی LPG لە ناو قەرەباڵغی شەقامى سەهۆڵەکە غاز بەتاڵ دەکات
964+
دیلان محەمەد جەزا – سلێمانى
لەسەر بەتاڵکردنى غازى شل LPG لەلایەن تەنکەرێکەوە لە شەقامى سەهۆڵەکە، بەرگرى شارستانى سلێمانى دەڵێت: بۆیان نیە لە کاتی قەرەباڵغیدا غاز بەتاڵ بکەن و سزایان دەدەین.
ئێوارەى ئەمڕۆ پێنجشەممە، لە قەرەباڵغى شەقامى سەهۆڵەکەى شارى سلێمانى، تانکەرێکى گواستنەوەى غازى شل، لە دەرەوەى رێنماییەکان غازى بەتاڵ دەکرد، 964 پەیوەندى بە ئارام عەلی، وتەبێژی بەرگری شارستانی سلێمانی کرد و وتى،”لە وەرزی هاوینەوە سەرجەم ئەو ئۆتۆمبێلانەی تایبەتن بە گواستنەوەی غازی ئاگادار کراونەتەوە کە ناتوانن بە رۆژ لەبەر گەرما غاز بەتاڵ بکەن، بەڵام ئێستا کە وەرزى زستانە، کاتیان بۆ دیارى نەکراوە”.
وتەبێژى بەرگرى شارستانى دەڵێت: ئاگادار کراون کە نابێت لە شوێنی قەرەباڵغدا غاز بەتاڵ بکەن.
“پێشتر ئەو کۆمپانیایە سەرپێچی کردوە و بڕی 500 هەزار دینار سزا دراوە و ئەمە جاری دووەمیەتی سزاکەی زیاتر دەبێت و سزا دەدرێت”، وتەبێژى بەرگرى شارستانى واى بە 964 وت.
لە شاری سلێمانی 35 کۆمپانیا لە بواری غازدا کاردەکەن و مۆڵەتی فەرمیان هەیە و لە دواى تەقینەوەکەى ماڵى حاجى مەزهەر بەهۆى لێچوونى غازەوە، بەرگرى شارستانى رێنماییەکانى توندتر کردووە.
پێداچوونەونە: وریا فەتاح
