دارستانە دەستکردەکەی بێتواتە چووە بواری جێبەجێکردنەوە

964+

پێشەوا محەمەد

ئەو دارستانە دەستکردەی بڕیار بوو لە سەروچاوەی ناحیەی بێتواتە دروست بکرێت چووەتە بوواری جێبەجێکردنەوە و بەڕێوەبەری ناحییەکە دەڵێت، 50 دۆنم سەوز دەکرێت.

دارستانەکە لە لایەن رێکخراوی WFPـیەوە دروست دەکرێت و بۆ ماوەی سێ ساڵ خزمەتی دارستانەکەش دەگرێتە ئەستۆ.

ئیبراهیم مەحمود، بەڕێوەبەری ناحیەی بێتواتە بە 964ـی راگەیاند، دوو رۆژە دەستیان بە دروستکردنی رێگاکە کردووە بۆ رێکخراوەکە تا دەست بکەن بە کاری سەوزکردنەکە.

وتیشی، “ئەو شوێنە بەردەڵانە و سیمایەکی جوان دەدات بە سنوورەکە و رێژەی سەوزایی بۆ نزیکەی 13% بەرزدەکاتەوە و هیچ زەوییەکی کشتوکاڵیش لە دەست ناچێت”.

ئەوە دەبێتە یەکەم دارستانی دەستکرد لە سنوورەکە.

“ئەو دارانەی ئەو رێکخراوە لەو دارستانە دەستکردە دەیانڕوێنێت تەنیا سێ ساڵ ئاویان دەوێت و ئێمە رێگاکەمان بۆ بردوون و ئەوانیش تانکییەکی ئاوی 40 هەزار لیتری بۆ ئاودانی دارەکان دادەنێن و دوای سێ ساڵ رادەستی ئێمەی دەکەنەوە”، ئەوەش قسەی بەڕێوەبەری ناحیەی بێتواتەیە.

بێتواتە: بۆ یەکەمجار بەلەمێکی فریاگوزاری بۆ بەنداوی سەروچاوە دابین کرا.