زیاتر لە یەک ملیار دینار بۆ پڕۆژەکانی کارەبای دوکان خەرجکراوە

ئەحمەد مستەفا

لە ماوەی ساڵی 2023 لە سنوری بەڕێوەبەرایەتی دابەشکردنى کارەباى دوکان، به‌ بڕی نزیکەی یەك ملیار و شەش سەد ملیۆن دینار پرۆژە جێبەجێ کراوە، کە زۆرینەیان دانانی محاویلەی کارە بووە.

جگە لە ناو سەنتەرى قەزاى دوکان و بازیان، پڕۆژەکان هەریەکە لە ناحیەکانى خدران، سورداش، پیرەمەگرون، خەلەکان، بنگرد – ی لە خۆگرتووە.

سیروان محەمەد، بەڕێوبەری راگەیاندن و پەیوەندییەکانی کارەبای سلێمانی بە 964ی وت، لە ناو سەنتەری دوکان سێ پڕۆژە، لە ناحیەی خدران پێنج پڕۆژە، ناحیەی سورداش دوو پڕۆژە، پیرەمەگرون حەوت پڕۆژە و لە بازیانیش 13 پڕۆژە ئەنجامدراون.

بەگوێرەی ئەو لیستەی کە کارەبای سلێمانی پڕۆژەکانی تێدا جێگیرکردووە، زۆرینەیان دانانی محاویلە و پێگەیاندنی کارەبا بووە بە گوندەکان و گەڕەکە نوێیەکان ئەو ناوچانە، بەوتەی سیروان محەمەد بێت، “بەشێک لەو گەڕەک و ناوچانەی دەکەونە سنوری دابەشکردنی کارەبا دوکان، پێگەیاندن و نۆژەنکردنەوەی فیدەر و محەویلەی کارەبایان لەئێستادا لە قۆناغی جێبەجێکردندایە”.