تونێلی دەربەندیخان لە قوڕ و لیتەی شاخی بەرانان پاککرایەوە

964+

ژووری هەواڵ

بارانبارینەکەی چەند رۆژی رابردوو، بەشێک لە خاک و خۆڵی چیای بەرانانی راماڵیبووە خوارەوە بۆ بەردەم تونێلی دەربەندیخان، ئەمە ئاستەنگی هاتوچۆی دروستکردبوو و ببوە هۆی داخرانی بەشێک لە رێگاکە.

ئەمڕۆ پێنجشەممە 23.11.2023، سلێمان محەمەد، قایمقامی دەربەندیخان بە 964ـی راگەیاند، ئەم بارانەی چەند رۆژی رابردوو، لەگەڵ شکانی بۆڕی حەوزی مۆڵی بوونەتە هۆی زیانگەیاندن بە بەشێک لە تونێلی دەربەندیخان و رۆچوونی قوڕ و لیتەی شاخی بەرانان بۆ بەردەم تونێلەکە، بەڵام بە گەڵابە ئەو خۆڵ و قوڕەمان لابرد.

بۆڕی ئاوی بەشێک لە ناوچەکانی چواردەوری تونێلی دەربەندیخان، بەنێو تونێلەکەدا تێدەپەڕن، بە گوتەی قایمقامی قەزاکە لە ماوەی چەند ساڵی رابردوودا ئەو بۆڕیانە کێشەیان هەبووە و شکاون، ئەمەش بووەتە هۆی رۆچوونی بەشێک لە خاکەکەی ژێر و چواردەوری تونێلەکە.

تونێلی دەربەندیخان لە ساڵی 1995 دروستکراوە، درێژییەکەی 720 مەترە، چەندین جار تونێلەکە بە رووداوی هاتوچۆ و رووداوی سروشتی خراپ بووە، لە دواینجاردا لە چواری تشرینی یەکەم، دەستکرا بە نۆژەنکردنەوەی تونێلەکە.

رێگای نێوان دەربەندیخان - چنارە نۆژەنکرایەوە