بەرگری شارستانی هەولێر بە تەواوی کارمەندەکانییەوە لە ئامادەباشیدایە

964+

توانا نەقی

بەشێک لە گەڕەک و ناحیەکانی دەورووبەری هەولێر بەهۆی باران بارینەکەی ئەمڕۆوە ئاوی تیادا کۆبووەتەوە و لافاو لە چەند کۆڵانێکیش دروست بووە.

بەرگری شارستانی هەولێریش دەڵێت، بە تەواوی ئەفسەر و کارمەندەکانیانەوە لە حاڵەتی ئامادەباشیدان.

کاروان عەلی وتەبێژی بەرگری شارستانی هەولێر بە 964ـی وت، چوار بنکەیان بەتایبەت لە دارە توو، بەحرکە، گەڕەکی شادی و ئازادی لە ئەرکدان و لە هەرشوێنێکەوە پەیوەندییان پێوە بکرێت دەست و دەم دەچنە هانایانەوە.

وتیشی، لە ئەو ناحیە و گەڕەکانە بەشێک لە ماڵەکان ئاوی تێچووە و لافاو لە کۆڵانەکانیان دروستبووە، هەروەها ئێستا لە پردی سەیداوە لە ناوەندی شار لافاو دروستبووە.

بەشێک لە شەقامی 100 مەتری هەولێریش نزیک زانکۆی جیهان بە تەواوی داخراوە بە هۆی کۆبوونەوەی ئاوەوە و سەیارەیەکی زپر لەسەر شەقامەکەن.

کاروان عەلی ئاماژەی بەوەشکرد، هەرچەندە هەینییە و پشووە، بەڵام زۆرینەی ئەفسەر و کاەرمەندەکان گەڕاونەتەوە دەوام و ئامادەن بۆ بەهاناوە چوونی هەر حاڵەتێکی نەخوازراو لە هەر گەڕەک و شەقام و ناوچەیەک.

لە نیوەڕۆی ئەمڕۆ 3.11.2023 شەپۆلێکی باران بارین زۆرێک لە ناوچەکانی هەرێمی کوردستانی گردووەتەوە و تا ئێستاش بەردەوامە.