رووداوێکی هاتوچۆ لە ئێران. فۆتۆ: سۆشیاڵ میدیا
هەموو رۆژێک دوو مردن هەیە
پۆلیسی ورمێ: رۆژانە 138 رووداوی هاتوچۆ روودەدەن
964+
هاوبەش ئەبوبەکر
لە ماوەی شەش مانگی رابردوودا، زیاتر لە 25 هەزار رووداوی هاتوچۆ لە پارێزگای ورمێ لە رۆژهەڵاتی کوردستان روویانداوە و بەهۆیەوە 373 کەس گیانیان لەدەستداوە.
بەپێی ئەم ژمارانە کە لەلایەن بەڕێوەبەری پۆلیسی پارێزگای ورمێ بڵاوکراونەتەوە، رۆژانە لەو پارێزگاکە زیاتر لە دوو کەس بە رووداوی هاتوچۆ گیانلەدەستدەدەن و رۆژانە زیاتر لە 138 رووداو روودەدەن.
رەحیم جەهانبەخش، بەڕێوەبەری پۆلیسی پارێزگای ورمێ، لە کۆنفرانسێکی رۆژنامەوانیدا رایگەیاند، لە ماوەی شەش مانگدا 25 هەزار و 114 رووداو روویانداوە و لە ئەنجامی ئەو رووداوانەدا 373 کەس گیانیان لەدەستداوە و 8 هەزار و 366 کەسیش بریندار بوونە.
بەراورد بە ساڵی رابردوو ژمارەی برینداری رووداوەکانی هاتوچۆ لە پارێزگای ورمێ 15٪ زیادیکردووە.
لە ماوەی یەک ساڵدا و رێکەوتی 21.3.2022 تاوەکو 21.3.2023 لە رۆژهەڵاتی کوردستان، دوو هەزار و 247 کەس بە رووداوی هاتوچۆ گیانیان لەدەستداوە، کە رۆژانە دەکاتە شەش کەس، ئەمە بەپێی ئامارەکان رێکخراوی دادپزیشکی ئێران.
