تورکیا: بەمنزیکانە بۆری نەوتی عێراق-تورکیا دەکەوێتەوە کار

964+

هاوبەش ئەبوبەکر

وەزیری وزە و سەرچاوە سروشتییەکانی تورکیا رایگەیاند، ئێستا بۆری نەوتی کوردستان-جەیهان هیچ کێشەی تەکنیکی نەماوە و بەمنزیکانە ئامادە دەبێت بۆ هەناردەکردنەوەی نەوت.

ئاڵپەرئەرسڵان بایراکتار، وەزیری وزە و سەرچاوە سروشتییەکانی تورکیا، لە دیمانەیەکدا لەگەڵ ژمارەیەک رۆژنامەوانی وڵاتەکەی رایگەیاند، بەشێک لەو زیانانەی کە بەر بۆری نەوتی کوردستان-جەیهان کەوتوون، بەهۆی بومەلەرزەکەی رۆژی 6ـی شوباتی ئەمساڵ و لافاوەکەی دواتر بووە.

“تیمەکانی چاککردنەوەی بۆری نەوتی جەیهان_عێراق، راپۆرتێکیان لەبارەی کێشە تەکنیکییەکان ئامادەکردووە و بەگوێرەی دوایین راپۆرت، کێشە تەکنیکییەکان چارەسەرکراون و لەسەروبەندی ئامادەکردنی بۆرییەکەدان بۆ کردنەوەی. بەمنزیکانە بەتەواوەتی ئامادە دەبێت و دەخرێتەوە کار”، ئاڵپەرئەرسڵان بایراکتار وای وت.

تورکیا سكاڵای لەسەر عێراق تۆمار کرد

لەبارەی کەیسەکانی دادگا لەدژی گرێبەستە نەوتییەکانی تورکیا لە عێراق، بایراکتار وتی، لە دادگەیەکی ئەمریکیدا تانەیان لە بڕیاری دادگای نێوبژیوانی پاریس داوە و داوای قەرەبووی 950 ملیۆن دۆلاریان لە عێراق کردووە.

راشیگەیاند، پێویستە عێراق و تورکیا لە رێگەی گفتوگۆ و دیالۆگی دۆستانە، کێشەکانی نێوانیان چارەسەر بکەن.