وێنەی ئامێری ئەلیکترۆنی بۆ هەژمارکردنی پارەی هاوبەشانی کارەبا لەسەر سیستەمی پریپەید - وێنە: کارەبای سلێمانی
کارەبای سلێمانی ئامێری پارەدان دەدات بە دانیشتووانی دوو سیتی
964+
هاوبەش ئەبوبەکر
کارەبای سلێمانی دانیشتووانی دوو کۆمەڵگەی نیشتەجێبوون ئاگادار دەکاتەوە کە سبەی تاوەکو رۆژی دووشەممە، ئامێری داخڵکردنی کارت دابەشدەکرێت بەسەریاندا.
ئەمڕۆ هەینی 21.7.2023، سیروان محەمەد بەڕێوەبەری راگەیاندنی کارەبای سلێمانی بە 964ـی وت، پێدانی ئامێرەکە قۆناغێکە لە پرۆسەی دانانی پریپەید بۆ هەردوو کۆمەڵگەی نیشتەجێبوونی پاک سیتی و بەهاران.
سبەی شەممە 22.7.2023، دانیشتووانی پاک سیتی و رۆژی دووشەممەش 24.7.2023، کۆمەڵگەی نیشتەجێبوونی بەهاران ئامێری CIUـیان پێدەدرێت کە لە رێگەیەوە کارت داخڵ دەکرێت.
سیستمی پریپەید، جۆرێکی سیستمی دابینکردنی کارەبایە کە هاوبەش پێشوەختە پارەی کارەباکەی دەدات، ئێستا لە هەندێک پڕۆژەی نیشتەجێبوون و ناوچەی هەرێمی کوردستاندا جێبەجێ دەکرێت.
بە پێی زانیارییەکانی وەزارەتی کارەبای هەرێم، هەر شوێنێک سیستمی پریپەیدی هەبێت، پارە کەمتر دەدات، کارەباکەی 24 کاتژمێرییە، پێویستی بە مۆلیدەی گەڕەک نابێت، ژینگەکەی پاک دەبێت و ڤۆڵتییەی کارەباکەی جێگیر دەبێت.