لە بری ئاسن مینی دژە تانکی بردووە بۆ دروستکردنی شیش

هاوبەش ئەبوبەکر

لە سکرابی کارگەیەکی دروستکردنی شیش لە بازیان، مینێکی دژە تانک دۆزرایەوە، کە وەک ئاسن براوەتە کارگەکە بە مەبەستی تواندنەوە.

مینەکە لە جۆری VS2.2ـە و لە “کارگەی شیشی ئەلفا ستیل”، لە گوندی کانی شەیتان، سەر بە ناحیەی تەیناڵی قەزای بازیان دۆزراوەتەوە و بە مەبەستی لەناوبردن گواستراوەتەوە شوێنێکی دیکە.

ئەمڕۆ یەکشەممە 16.7.2023، جەبار مستەفا سەرۆکی دەزگای کاروباری مین بە 964ـی راگەیاند، مینەکە لەگەڵ پارچە ئاسنی دیکە براوەتە کارگەکە و لە کۆگای عەمبارکردنی وردەئاسن دۆزراوەتەوە.

پێشتر لە مانگی ئایاری ساڵی 2020، بەهۆی تەقینەوەیەک لە بەشی سکرابی کارگەی شیشی ماس لە ناحیەی بازیان، سەرپەرشتیارێک گیانی لەدەستداوە.