پێش کۆتایی ئەمساڵ دەبێت

کۆنگرەیەکی نیشتیمانی تایبەت بە پاراستنی منداڵ رێکدەخرێت

964+

پێشەوا محەمەد – سلێمانی

لە هەرێمی کوردستان کۆنگرەیەکی نیشتیمانی تایبەت بە پاراستنی منداڵ رێکدەخرێت و وەزارەتی کاروباری کۆمەڵایەتی پێیهەڵدەستێت.

ئەمڕۆ یەکشەممە 11.6.2023 سێیەم کۆبوونەوەی ئەنجومەنی باڵای تایبەت بە پاراستنی منداڵ لە وەزارەتەکە بەڕێوەچووە و بڕیاری بەستنی ئەو کۆنگرەیە دراوە.

وەزارەتی کار و کاروباری کۆمەڵایەتی حکومەتی هەرێم دەیەوێت کۆنگرەکە پێش کۆتایی ئەمساڵ بەڕێوەبچێت.

لە راگەیەندراوێکی وەزارەتەکەدا هاتووە، “لە ماوەی یەك هەفتەدا تەوەرەكانی كۆنگرە دەستنیشان دەكرێت و ئەو مامۆستایانەی لە زانكۆكانن و پسپۆڕی بوارەكەن دەستنیشان دەكرێن بۆ ئامادەکردنی توێژینەوە”.

بە پێی ئامارێکی رێکخراوی منداڵپارێزی کوردستان کە دەست 964 کەوتووە، 1213 منداڵی ئیشکەر لە هەرێمی کوردستان بوونیان هەیە و 500 لەوانە منداڵی ناوخۆن و ئەوانی تر هی دەرەوەی هەرێمن.

“هەفتەی داهاتوو لیژنەیەك دەستنیشان دەكرێت بۆ سەرپەرشتیكردنی ئەو مامۆستایانەی كە توێژینەوەكەیان دەنووسن و دواتر دەنێردرێت بۆ لایەنی پسپۆڕ بۆ هەڵسەنگاندنی توێژینەوەكانیان”، راگەیەندراوەکەی وەزارەتی کار و کاروباری کۆمەڵایەتی وادەڵێت.

جەختیش لەوە کراوەتەوە، “هەر مامۆستایەک دەیەوێت بەشداربێت خۆی راستەوخۆ دەتوانێت پەیوەندی بە لیژنەکەوە بکات”.