کێشەی ئایفۆن ١٤ی پڕۆ تەواو نابێ
+964
بڵند عوسمان – هەولێر
ئایفۆن ١٤ی پڕۆ و ١٤ی پڕۆ ماکس کێشەی نوێیان تێدا دەردەکەوێت، لە هەندێک حاڵەتدا داینامیک ئایلاندەکەیان دەبێتە دوو دانە و داهێنانەکەی ئەپڵ تێکدەدات.
لە جۆرە پڕۆکانی ئایفۆنە نوێیەکانی ئەمساڵ، تایبەتمەندییەکی نوێ زیادکراوە بە ناوی داینامیک ئایلاند، بەو بەشە ڕەشەی سەرەوەی شاشەی مۆبایلەکان دەوترێ، کە کامێرای پێشەوە و هەستەوەرەکانی دەکەوێتە ناو.
ئەم تایبەتمەندییە یەکێکە لە باشترین تێکهەڵکێشەکانی هاردوێر و سۆفتوێری ئەپڵ کە تا ئێستا درووستی کردبێت، بەڵام لەم چەند نوێکارییەی بۆ سۆفتوێری مۆبایلەکان هاتووە هەندێک کێشە بۆ بەکارهێنەران دروست بووە لەگەڵ ئەم تایبەتمەندیەدا، کە لە هەندێک حاڵەتدا دەردەکەوێت و لە بایەخ و گرنگی ئەم داهێنانەی ئەپڵ کەمدەکاتەوە.
ئایفۆن ١٤ لە ٧ی سێپتێمبەری ئەمساڵ ناسێندرا، کە نوێترین زنجیرەی کۆمپانایی ئەپڵە، بە یەکێک لە بە بەهێزترین و باشترین مۆبایلە زیرەکەکان لە ئێستادا هەژمار دەکرێت.